Chiranjeevi: వయస్సులో పెద్ద అయినా కూడా నాతో అలా.. ఎఎన్నార్‌పై మెగాస్టార్ ట్వీట్

అక్కినేని నాగేశ్వర రావు.. ఈ పేరు తెలియని తెలుగు సినీ ప్రేక్షకులు ఉండరు అనడంలో ఎలాంటి అతిశయోక్తి లేదు. బాలనటుడిగా ఇండస్ట్రీలోకి ఎంట్రీ ఇచ్చిన ఆయన ఆరు దశాబ్ధాల పాటు తెలుగు పరిశ్రమకు సేవలు అందించారు. కేవలం నటుడిగానే కాకుండా నిర్మాతగా కూడా ఎన్నో అద్భుతమైన సినిమాలు అందించారు. ‘సీతారామ జననం’ అనే సినిమాతో హీరోగా ఎంట్రీ ఇచ్చిన ఆయన ఎన్నో సూపర్‌హిట్ సినిమాల్లో నటించారు. చివరిగా అక్కినేని ఫ్యామిలీ అంతా కలిసి నటించిన ‘మనం’ సినిమాలో నటించిన ఆయన.. 2014లో తుదిశ్వాస విడిచారు.

ఆయన మరణం సినీ పరిశ్రమకు తీరని లోటుగా మిగిలిపోయింది. అయితే సోమవారం నాగేశ్వర రావు 97వ జయంతి. ఈ సందర్బంగా ఆయన్ని గుర్తు చేసుకుంటూ.. ఆయన కుటుంబసభ్యులు, సినీ పరిశ్రమ పెద్దలు, అభిమానులు ట్వీట్లు చేస్తున్నారు. మెగాస్టార్ చిరంజీవి కూడా నాగేశ్వరావును గుర్తు చేసుకుంటూ తనదైన స్టైల్‌లో ట్వీట్ చేశారు. వీరిద్దరు కలిసి ‘మెకానిక్ అల్లుడు’ సినిమాలో నటించారు. బి.గోపాల్ దర్శకత్వంలో తెరకెక్కిన ఈ సినిమా అప్పట్లో భారీ బ్లాక్‌బస్టర్ హిట్‌గా నిలిచింది. అయితే నాగేశ్వరరావు జయంతి సందర్భంగా ఆయనతో కలిసి దిగిన ఫోటోతో చిరు ట్వీట్ చేశారు.

‘నటుడు, పద్మ విభూషన్, దాదా సాహెబ్ ఫాల్కే అవార్డు గ్రహీత డా.అక్కినేని నాగేశ్వర రావు గారిని ఆయన పుట్టినరోజు సందర్భంగా గుర్తు చేసుకుంటున్నాను. మా ఇద్దరి మధ్య వయస్సులో చాలా తేడా ఉన్నా.. ఆయన ఎప్పుడూ నన్ను ఓ స్నేహితుడిలా చూసుకొనే వారు. దేవదాసు నుంచి మనం వరకూ ఆయన నటించిన ఎన్నో సినిమాలో ప్రేక్షకుల మదిలో చిరస్థాయిగా నిలిచిపోయాయి. ఆ లెజెండ్‌కు నా గౌరవపూర్వక నమస్కరాలు’ అంటూ చిరు ట్వీట్‌లో పేర్కొన్నారు. చివర్లో ‘ఎఎన్నార్ లీవ్స్ ఆన్’ అనే హ్యాష్‌ట్యాగ్‌ని ఆయన జత చేశారు.