Allu Ramalingaiah: అల్లు వారు తరతరాలు తలుచుకోవాలి.. ఆ ఆలోచనే ఓ వ్యవస్థగా మారింది: చిరంజీవి

దివంగత హాస్య నటుడు అల్లు రామలింగయ్య (Allu Ramalingaiah) శత జయంతి ఉత్సవాల సందర్భంగా అల్లు స్టూడియోస్ (Allu Studios) మెగాస్టార్ చిరంజీవి (Chiranjeevi) ప్రారంభించారు. ఈ సందర్భంగా ఆయన మాట్లాడుతూ.. మా మావయ్య (అల్లు రామలింగయ్య) గారి శత జయంతి సందర్భంగా ఆయనను గుర్తు చేసుకుంటూ నివాళి అర్పిస్తున్నట్లు చెప్పారు. చాలామంది నటులలో చాలా కొద్ది మంది మాత్రమే ఇలాంటి ఘనత లభిస్తుందన్నారు. ఆయన వేసిన బాటలో అల్లు అరవింద్, బన్నీ శిరీష్, బాబీ విజయవంతంగా నడుస్తున్నారని అన్నారు.

'నాడు నటుడిగా ఎదగాలని రామలింగయ్య గారి ఆలోచనే నేడు ఓ వ్యవస్థగా మారింది. అల్లు వారు తరతరాలు ఆయనను తలుచుకుంటూనే ఉండాలి. ఆయన కుమారుడు అల్లు అరవింద్‌ను నిర్మాతను చేయాలని గీతా ఆర్ట్స్‌ను స్థాపించి ఓ మార్గం చూపించారు. అల్లు స్టూడియోస్ లాభాపేక్ష కోసం ఏర్పాటు చేయలేదని నేను అనుకుంటున్నా. ఇది లాభాపేక్ష కంటే స్టాటస్ సింబల్. రాబోయే తరతరాలు అల్లు రామలింగయ్యను తలుచుకునేందుకు ఈ స్టూడియోను నిర్మించారని భావిస్తున్నాను.

చిరస్థాయిలో ఆయన పేరు నిలబడేలా కృషి చేసిన అల్లు అరవింద్, అల్లు అర్జున్, శిరీష్, బాబీలను మనస్ఫూర్తిగా అభినందిస్తున్నా. ఆ కుటుంబంలో భాగం కావడం నేను హ్యాపీగా ఫీలవుతున్నా..' అంటూ చిరంజీవి చెప్పుకొచ్చారు. గాడ్ ఫాదర్ మూవీ ప్రమోషన్స్‌లో భాగంగా సల్మాన్‌తో ముంబైలో ఓ ఈవెంట్‌లో పాల్గొనాల్సి ఉన్నందును ముందుగా వెళుతున్నానని.. సాయంత్రం తిరిగి వచ్చి తన మనసులోని మాటను ఇంకా వివరంగా చెబుతానని అన్నారు.


గండిపేట్‌లో 10 ఎకరాల్లో అల్లు స్టూడియోస్‌ను భారీ స్థాయిలో నిర్మించారు. అత్యాధునిక టెక్నాలజీతో.. ప్రపంచ స్థాయి సధుపాయాలు ఈ స్టూడియోలో అందుబాటులో ఉన్నాయి. మూవీకి సంబంధించి అన్ని పనులు ఇక్కడే చేసుకునేలా ఏర్పాటు చేశారు. షూటింగ్స్‌కు సంబంధించిన బిల్డింగ్‌ పనులు పూర్తవ్వడంతో.. సినిమా చిత్రీకరణకు అందుబాటులోకి వచ్చాయి. అన్నపూర్ణ స్టూడియో, రామానాయుడు స్టూడియో, పద్మాలయ స్టూడియో, సారథి స్టూడియోల తరహాలో అల్లు స్టూడియోస్‌లో కూడా ఇక నుంచి సినిమాల షూటింగ్స్ జరగబోతుంది.