పవన్ ఆ రూపం కళ్ల ముందు కదలాడుతుంది: చిరంజీవి

లవ్ స్టోరీలను చిత్రీకరించడంలో డైరెక్టర్ కరుణాకరన్ ఆయనకు ఆయనే సాటి అని మెగాస్టార్ చిరంజీవి కొనియాడారు. ఆయన దర్శకత్వంలో వస్తున్న ‘తేజ్ ఐ లవ్ యూ’ చక్కటి ఫ్యామిలీ ఎంటర్‌టైనర్‌గా అందర్నీ అలరిస్తుందని ఆయన చెప్పారు. సాయి ధరమ్ తేజ్, అనుపమ పరమేశ్వరన్ హీరో హీరోయిన్లుగా తెరకెక్కుతున్న చిత్రం ‘తేజ్ ఐ లవ్ యూ’. క్రియేటివ్ కమర్షియల్స్ పతాకంపై కె.ఎస్. రామారావు నిర్మిస్తున్న ఈ సినిమా ప్రి రిలీజ్ వేడుకను శనివారం (జూన్ 9) హైదరాబాద్‌లోని జేఆర్‌సీ కన్వెన్షన్ సెంటర్‌లో నిర్వహించారు. ఈ కార్యక్రమానికి చిరంజీవి ముఖ్య అతిథిగా హాజరై ప్రసంగించారు.

‘లవ్ స్టోరీలను తెరకెక్కించడంలో కరుణాకరన్ ప్రతిభ ఏంటో అందరికీ తెలుసు. ఆయన సినిమాల్లో తొలిప్రేమ నాకు ఇప్పటికీ ఇష్టం. మా పవన్ కళ్యాణ్ నటించిన సినిమా తొలి ప్రేమ ఎంత పెద్ద హిట్టో ప్రత్యేకంగా చెప్పక్కర్లేదు. ఆ సినిమాల్లో పవన్‌ను చూపించనంత చక్కగా మరెవరూ చూపెట్టలేదు. వైట్ అండ్ వైట్ పవన్ నా కళ్ల ముందు ఇప్పటికీ కదలాడతాడు’ అని చిరంజీవి చెప్పుకొచ్చారు.

తేజ్ ఐ లవ్ యూ కన్నుల పండువగా ఉందని, ఇదో చక్కటి లవ్ స్టోరీ అని చిరంజీవి తెలిపారు. జీరో నుంచి మొదలయ్యే సినిమా ఇంటర్వెల్ వరకు 50 శాతం, క్లైమాక్స్‌కి చేరుకునే వరకు 100 శాతం నచ్చుతుందని ఆయన చెప్పారు. సినిమాలో అనుపమ పరమేశ్వరన్ మరింత అందంగా కనిపించిందని కితాబిచ్చారు. సాయి ధరమ్ తేజ్ అద్భుతంగా నటించాడని కొనియాడారు.

ఆ దాహం తీరనిది..
యంగ్ డైరెక్టర్లు గ్యాప్ తీసుకోవడం ఇండస్ట్రీకి అన్యాయం అని కరుణాకరన్‌ను ఉద్దేశించి అన్నారు. ఆయన తనకు ఎంత పెద్ద అభిమానో చెప్పుకొచ్చారు. రోజూ ఉదయాన్నే తన ఇంటి వద్దకు వచ్చి ఎదురు చూసేవాడని, కారు అద్దంలోంచి తనను చూడటానికి తెగ పాట్లు పడేవాడని తెలిపారు. సినిమా వార పత్రికల్లో వచ్చే తన ఫొటోలను కత్తిరించుకొని ఆల్బమ్ తయారు చేసుకునేవాడని చెప్పారు.

‘డైరెక్టర్లు, సాఫ్ట్‌వేర్ ఇంజనీర్లు.. ఇలా ఎంతో మంది పేరున్నవారు కూడా నాపై ప్రేమ, అభిమానం కురిపిస్తున్నారు. అంతకంటే ఈ జన్మకు కావాల్సింది ఏముంటుంది? ఈ జన్మకిది చాలదా! అభిమానుల ఈలలు, చప్పట్లు నాకు ఎప్పుడూ కొత్త ఉత్సాహాన్నిస్తాయి.. ఆ దాహం తీరనిది...’ అని మెగాస్టార్ అన్నారు.