పవన్ కళ్యాణ్ అంటే చాలా ఇష్టం
ఈనెల 6న జరిగే ఎన్ఐటీ వరంగల్ స్ప్రింగ్‌ స్ప్రీకి పవర్ స్టార్ పవన్ కళ్యాణ్ చీఫ్ గెస్ట్‌గా వస్తున్నారని.. ఇదే ఏడాది ఎన్‌ఐటీకి రావడం, అంతగా మీరు ఎదగడం ఎలా అనిపిస్తుంది అని కిరణ్ అబ్బవరంను విద్యార్థి ప్రశ్నించారు. దీనికి కిరణ్ సమాధానం చెబుతూ.. ‘ఇలాంటి క్షణాలు చాలా ఆనందన్నిస్తాయి. లైఫ్‌లో మనం కొన్ని రిస్క్ చేస్తాం. జాబ్ మానేసిన తరవాత కొన్ని రోజులు బాగా ఇబ్బంది పడ్డాను. ఏమైపోతాను, నా జీవితం నాశనైపోతుందా అనే బాధ ఉండేది. అది దాటుకొని రావడం, ఇలాంటి వన్నీ చూడటం చాలా ఆనందంగా ఉంది. ఆయనంటే నాకు చాలా ఇష్టం. పవన్ కళ్యాణ్ గారిని కలిశాను, ఆయనతో మాట్లాడాను. ఆయన్ని కలిసిన ఫీలింగ్ మాటల్లో చెప్పలేను’ అని అన్నారు.
‘భీమ్లా నాయక్’ స్టేషన్ వాడేశాం
‘భీమ్లా నాయక్’ సినిమా కోసం వేసిన పోలీస్ స్టేషన్ సెట్‌లోనే ‘మీటర్’ సినిమాను కూడా చిత్రీకరించామని కిరణ్ అబ్బవరం చెప్పారు. పవన్ కళ్యాణ్ కూర్చున్న చైర్‌లోనే తాను కూడా కూర్చున్నానని అన్నారు. ఇవన్నీ యాదృచ్ఛికంగా జరిగాయని.. ఇలాంటి క్షణాలను చూసి తాను ఎంతో గర్వపడతానని, చాలా సంతోషంగా ఉంటుందని కిరణ్ వెల్లడించారు. ఇక పవన్ కళ్యాణ్‌ను తలుచుకున్నాక ఆయన మేనరిజం చేయపోతే బాగుంటుందా అని విద్యార్థులు అడగ్గానే తన కుడి చేతిని మెడ మీదుగా పోనిచ్చి ఆడిటోరియం మారుమోగిపోయేలా చేశారు కిరణ్. తనకు ఇండస్ట్రీలో అందరితోనూ నటించాలని ఉందని, అందరు డైరెక్టర్లతోనూ పనిచేయాలనుందని.. అయితే, తన అభిమాన హీరో పవన్ కళ్యాణ్‌తో కలిసి భవిష్యత్తులో తాను నటిస్తానని అనుకుంటున్నానని కిరణ్ చాలా కాన్ఫిడెంట్‌గా చెప్పారు.
పవన్ కళ్యాణ్ చైర్‌లో నేను కూర్చున్నా: కిరణ్ అబ్బవరం
నేను సినిమాల్లోకి వెళ్తున్నట్టు మా ఇంట్లో తెలీదు
మధ్యతరగతి కుటుంబం నుంచి వచ్చిన తాను సినిమాల్లోకి వెళ్తున్నట్టు తన తల్లిదండ్రులకు కానీ, కుటుంబ సభ్యులకు కానీ తెలీదని కిరణ్ అబ్బవరం చెప్పారు. ‘మా ఇంట్లో వాళ్లకు కానీ, నాకు కానీ.. ఒక సినిమా అనేది చూడగలం కానీ, సినిమాల్లోకి వెళ్లాలి అనే ఆలోచన చాలా భయంకరంగా ఉంటుంది. నేను పుట్టిన ప్రాంతానికి కానీ, మా కుటుంబానికి కానీ సినిమాలో నటించడం అనేది చాలా దూరమైన విషయం. అది పెద్ద కలలా ఉంటుంది తప్ప నిజం చేసుకోలేం అని ఉండేది. నాకు ఎక్కడో కోరిక పుట్టింది, నేను చేయగలిగితేనే ఇంట్లో వాళ్లకు చెప్దాం, ఒక వేళ నేను చేయలేక ఫెయిల్ అయితే ఇంట్లో వాళ్లకు చెప్పకూడదు అనే ఉద్దేశం నేను సినిమాల్లోకి వెళ్తున్నట్టు ఇంట్లో చెప్పలేదు. ‘రాజావారు రాణి గారు’ సినిమా చేసి పోస్టర్ పడిన తరవాతే వాళ్లకు తెలిసింది. అది చూసిన తరవాత వాళ్లు ఇంకేమీ అనలేదు. చాలా ఆనందంగా ఉన్నారు’ అని కిరణ్ చెప్పుకొచ్చారు.
రాజకీయాలంటే ఆసక్తి
ఇక ఈ కార్యక్రమాన్ని ముగించే సమయంలో ఓ విద్యార్థి నుంచి కిరణ్ అబ్బవరంకి ఒక ఆసక్తికర ప్రశ్న ఎదురైంది. ‘మీరు ఒకవేళ యాక్టర్ అవ్వకపోయి ఉంటే ఏ ప్రొఫెషన్ ఎంపిక చేసుకునేవారు’ అని ఒక విద్యార్థిని ప్రశ్నించింది. దీనికి కిరణ్ సమాధానం చెప్తూ.. ‘పాలిటిక్స్‌లోకి వెళ్లేవాడినేమో. నాకు మనుషులంటే నాకు చాలా ఇష్టం. వాళ్ల మధ్యలో ఎప్పుడూ తిరుగుతూ ఉండాలి. అదృష్టం ఏంటంటే సినిమాల వల్ల నేను మీ అందరితో మాట్లాడగలుగుతున్నాను. ఇలా అందరితో ఇంటరాక్ట్ అవ్వడం నాకు చాలా ఇష్టం. ఇది కేవలం రెండు రంగాల్లోనే సాధ్యపడుతుంది. ఒకటి సినిమా, ఇంకోటి రాజకీయం. కాబట్టి ఇందులోకి రాకపోయుంటే అందులోకి వెళ్లేవాడినేమో’ అని అన్నారు.