HBD Chiranjeevi: ఎంతోమందికి ప్రాణదాత.. చిరంజీవికి రోజా బర్త్ డే విషెస్

మెగాస్టార్ చిరంజీవి (Chiranjeevi) పుట్టిన రోజు వేడుకలు మొదలయ్యాయి. రాజకీయ ప్రముఖులు, సినీ సెలబ్రిటీలు, అభిమానులు సోషల్ మీడియా వేదికగా బర్త్ డే విషెస్ చెబుతున్నారు. ఆయన చేసిన సేవలను గుర్తు చేసుకుంటున్నారు. మంత్రి రోజా పుట్టిన రోజు శుభాకాంక్షలు చెబుతూ ట్వీట్ చేశారు. “స్వయంకృషితో మెగాస్టార్‌గా ఎదిగి ఎందరో నటులకు ఆదర్శంగా నిలవడంతో పాటు బ్లడ్ బ్యాంక్ ద్వారా ఎంతోమందికి ప్రాణదాతగా నిలిచిన చిరంజీవిగారికి జన్మదిన శుభాకాంక్షలు” అంటూ రోజా రాసుకొచ్చారు.

'కోట్లాది మంది అభిమానుల గుండె చప్పుడు, సినీ కళామతల్లి ముద్దు బిడ్డ, అన్నయ్య చిరంజీవి గారికి హార్దిక జన్మదిన శుభాకాంక్షలు' అని డైరెక్టర్ బాబీ ట్వీట్ చేశారు. ప్రస్తుతం బాబీ డైరెక్షన్‌లో మెగా 154 మూవీలో చిరంజీవి నటిస్తున్న సంగతి తెలిసిందే. ఇందులో మాస్ మహారాజ రవి తేజ కూడా కీలక పాత్రలో నటిస్తున్నాడు.

రీల్ లైఫ్‌లో.. రియల్ లైఫ్‌లో నిజమైన సూపర్ హీరో అంటూ దర్శకుడు మెహర్ రమేష్ ట్వీట్ చేశారు. చిరంజీవి హీరోగా మెహర్ రమేష్ దర్శకత్వంలో భోళా శంకర్ మూవీ తెరకెక్కుతోంది. ఈ మూవీ ఏప్రిల్ 14, 2023న రిలీజ్ కానుంది. ప్రతి సంవత్సరం మాకు అందరికీ కలిసి వచ్చే ఒకే ఒక తెలుగు పండుగ మెగాస్టార్ బర్త్ డే. వెరీ హ్యాపీ బర్త్ డే అంటూ డైరెక్టర్ వెంకీ కుడుముల ట్వీట్ చేశారు. ఇతర ప్రముఖులు కూడా చిరంజీవికి సోషల్ మీడియా వేదికగా పుట్టినరోజు శుభాకాంక్షలు తెలుపుతున్నారు.