కారు ప్రమాదంలో మోడల్ సోనికా సింగ్ మృతి

కోల్‌కతాలో జరిగిన ఓ రోడ్డు ప్రమాదంలో బెంగాలీ మోడల్, యాంకర్ సోనికా సింగ్ చౌహన్ మృతిచెందగా ప్రముఖ బెంగాలీ నటుడు విక్రమ్ చటర్జీ తీవ్రంగా గాయపడ్డారు. కోల్‌కతాలో దేశ్ ప్రియ పార్క్ వైపు నుంచి రాష్‌బిహారీ జంక్షన్ వైపు వెళ్తుండగా శనివారం తెల్లవారుజామున జంక్షన్ వద్దే ఈ ప్రమాదం చోటుచేసుకుంది. సోనికా సింగ్, విక్రమ్ చటర్జీ ప్రయాణిస్తున్న కారు అదుపుతప్పి రోడ్డుపక్కనే వున్న ఫుట్‌పాత్‌ని ఢీకొంది. అనంతరం పల్టీలు కొడుతూ వెళ్లి రోడ్డు పక్కనే వున్న ఓ దుకాణాన్ని ఢీకొని ఆగిపోయింది.

ప్రమాదం జరిగిన సమయంలో వినిపించిన భారీ శబ్ధం తీవ్రతకు మేల్కున్న స్థానికులు అక్కడికి చేరుకునేలోపే తల లోంచి తీవ్ర రక్తస్రావమైన సోనికా సింగ్ రక్తపు మడుగులో పడి వున్నారు. సమీపంలోని రూబీ హాస్పిటల్‌కి తరలించే లోపే ఆమె తీవ్ర రక్తస్రావంతో మృతిచెందారు. డ్రైవింగ్ సీటులో చిక్కుకుపోయి కనిపించిన విక్రమ్ చటర్జీని అతి కష్టం మీద వెలుపలికి తీసిన పోలీసులు అతడిని హాస్పిటల్‌కి తరలించారు. తీవ్ర గాయాలపాలైన విక్రమ్‌కి ఐసీయులో అత్యవసర చికిత్స అందించి, అనంతరం అతడిని సాధారణ వార్డుకి తరలించారు. ఈ ప్రమాదంలో మృతి చెందిన మోడల్ సోనికా సింగ్ ఇండియ‌న్ ప్రో కబడ్డీ లీగ్‌కి యాంకర్‌గానూ వ్యవహరిస్తున్నారు.

సోనికా సీటు బెల్టు ధరించకపోవడమే ఆమె మృతికి కారణమై వుండొచ్చని పోలీసులు భావిస్తున్నారు. విక్రమ్ సీటు బెల్ట్ పెట్టుకున్న కారణంగానే అతడు గాయాలతో బయటపడినట్టు పోలీసులు తెలిపారు. ఘటన జరిగిన సమయంలో వెలువడిన శబ్ధం తీవ్రతని చూస్తోంటే, మితిమీరిన వేగమే ఈ ఘటనకి కారణమై వుండవచ్చుననిపిస్తోంది అంటున్నారు స్థానికులు.