దాసరి ఇంకా సలహాలిస్తున్నారు: మోహన్ బాబు

టాలీవుడ్ గాడ్ ఫాదర్ స్వర్గీయ దాసరి నారాయణరావు తొలి వర్ధంతి ఈరోజు. దర్శకుడిగా, నటుడిగా, నిర్మాతగా, పత్రికా అధిపతిగా.. నాలుగు దశాబ్దాలకు పైగా తెలుగు సినిమా ఇండస్ట్రీకి విశేష సేవలు అందించిన బహుముఖ ప్రజ్ఞాశాలి దాసరి మే 30, 2017న అనారోగ్య సమస్యలతో హైదరాబాద్‌లోని కిమ్స్ ఆసుపత్రిలో మరణించి టాలీవుడ్‌ని శోకసంద్రంలోకి నెట్టారు.

1974లో తాతా మనవడు సినిమాతో.. సినీ ప్రస్థానం ప్రారంభించిన దాసరి తొలి సినిమాకే నంది అవార్డు అందుకొని సంచలనం సృష్టించారు. ఆ తర్వాత తీసిన స్వర్గం-నరకం, మేఘ సందేశం, మామగారు సినిమాలకు కూడా నంది అవార్డులు అందుకున్నారు. శివరంజని, గోరింటాకు, ఏడంతస్తుల మేడ, స్వయంవరం, ప్రేమాభిషేకం, బొబ్బిలి పులి, తాండ్ర పాపారాయుడు, సర్దార్ పాపారాయుడు, మజ్ను, ఓసేయ్ రాములమ్మ, అమ్మ రాజీనామా, మామగారు లాంటి ఎన్నో అద్భుతమైన చిత్రాలను తెరకెక్కించారు. ఎమ్మెల్యే ఏడుకొండలు లాంటి చిత్రాలతో సమకాలీన రాజకీయాలపై వ్యంగాస్త్రం సంధించారు. ఆయన చివరి చిత్రం ఎర్రబస్సు.

ఇలా 151కి పైగా చిత్రాలకు దర్శకత్వం వహించి ది లెజెండరీ డైరెక్టర్ ఆఫ్ ఇండస్ట్రీ చరిత్ర సృష్టించిన దాసరి మోహన్‌బాబు, ఆర్‌.నారాయణమూర్తి, దర్శకులు కోడి రామకృష్ణ, రేలంగి నరసింహారావు, రవిరాజా పినిశెట్టి తదితర నటులు, ఎందరో సాంకేతిక నిపుణులను దాసరి తెలుగు చిత్ర పరిశ్రమకు పరిచయం చేశారు. సినీ పరిశ్రమలో ఎవరికీ ఏ ఆపద వచ్చినా.. ముందుగా దాసరి ఇంటి తలుపే తట్టేవారు. ఆయన మనల్ని విడిచి ఏడాది పూర్తైన తరుణంలో దాసరి శిఘ్యుడు మోహన్ బాబు ట్విట్టర్‌లో ఎమోషనల్ పోస్ట్ పెట్టారు.

‘మీరు మాకు దూరమై ఏడాది అయిందని ఎవరన్నారు.. అనుక్షణం ఎదుటే ఉన్నారు.. కలలో ఉన్నారు.. సలహాలు ఇస్తున్నారు.. మా కుటుంబాన్ని కాపాడుతూ ఉన్నారు.. ఎల్లప్పుడూ మీ ఆశీస్సులు కోరుకుంటున్నాం..’ అంటూ తన గురువుని స్మరించుకున్నారు మోహన్ బాబు.