‘గాయత్రి’ టీజర్: డైలాగ్ కింగ్ వస్తున్నాడు!

డైలాగ్ కింగ్ మోహన్ బాబు లీడ్ రోల్‌లో మంచు విష్ణు, శ్రియ జోడీగా నటిస్తున్న చిత్రం ‘గాయత్రి’. మదన్ దర్శకత్వం వహిస్తున్న ఈ చిత్రం ఫిబ్రవరి 9న ప్రేక్షకుల ముందుకు రానుంది. ఈ సందర్భంగా ప్రమోషన్స్ వర్క్స్‌ను వేగవంతం చేసిన చిత్రయూనిట్ ఈ మూవీ టీజర్‌ను రేపు (శనివారం) మధ్యాహ్నం 2 గంటలకు విడుదల చేస్తున్నట్టు పోస్టర్‌ను విడుదల చేసింది. మోహన్ బాబు రెండు విభిన్న పాత్రలో నటిస్తున్న ‘గాయత్రి’ చిత్రాన్ని శ్రీ లక్ష్మీ ప్రసన్న పిక్చర్స్ సొంత బేనర్‌లో నిర్మిస్తున్నారు.

ఇటీవల షూటింగ్ పూర్తిచేసుకున్న ఈ చిత్రానికి పోస్ట్ ప్రొడక్షన్ పనులు జరుగుతున్నాయి. కొత్త సంవత్సరం నాడు విష్ణు, శ్రియలు ఆదర్శ దంపతులుగా కనిపించే పోస్టర్‌కు కూడా మంచి స్పందనే వచ్చింది. తాజాగా చిత్రంలో కీలక పాత్ర పోషిస్తున్న నిఖిల విమల్ పోస్టర్‌ను విడుదల చేసారు. "నేను ఈ రోజు ఈ స్థాయిలో ఉన్నానంటే దానికి కారణం మా నాన్న" అని పోస్టర్‌పై ఉన్న కాప్షన్ బట్టి ఆమెది కథలో ప్రాధాన్యత ఉన్న పాత్ర అని తెలుస్తోంది. బ్రహ్మానందం మరియు అనసూయ చిత్రంలో ఇతర ముఖ్య పాత్రల్లో కనిపించనున్నారు. డైమండ్ రత్నబాబు కథ మాటలు అందించగా.. తమన్ మ్యూజిక్ అందిస్తున్నారు.