క్లారిటీ: ‘సైరా’కి తమన్ దరువు ఉన్నట్టా! లేనట్టా!

మెగాస్టార్ చిరంజీవి 151వ చిత్రం ‘సైరా నరసింహారెడ్డి’మూవీ ఆగష్టు నెలలో లాంఛ్ అయినప్పటికీ ఇంకా రెగ్యులర్ షూటింగ్‌ ప్రారంభం కాలేదు. ప్రస్తుతం కాస్ట్ ప్రోమో వర్క్స్ పనుల్లో బిజీగా ఉన్న చిత్ర యూనిట్ రెగ్యులర్ షూటింగ్‌కు డిసెంబర్‌ నెలను ఫిక్స్ చేసుకుంది. స్వాతంత్య్ర సమరయోధుడు ఉయ్యాలవాడ నరసింహారెడ్డి జీవిత చరిత్ర ఆధారంగా తెరకెక్కుతున్న ఈ ప్రతిష్టాత్మకంగా ప్రాజెక్ట్ నుండి ఒక్కొక్కరుగా తప్పుకోవడంతో టాలీవుడ్‌లో హాట్ టాపిక్‌గా మారింది ‘సైరా’ .

తొలిత ఈ ప్రాజెక్ట్ నుండి కెమెరామెన్ రవివర్మన్ తప్పుకోవడంతో ఆయన ప్లేస్‌లో రత్నవేలు చేరారు. ఇక మ్యూజిక్ విషయానికి వస్తే.. ‘సైరా నరసింహారెడ్డి’కి ఆస్కార్ విజేత ఏఆర్.రెహమాన్ సంగీతాన్ని అందివ్వాల్సి ఉండగా బిజీ షెడ్యూల్ వలన ఆయన ప్రాజెక్ట్ నుండి తప్పుకున్నారు. దీంతో అందరూ ‘సైరా’ మోషన్ పోస్టర్‌కు అద్భుతంగా బ్యాక్ గ్రౌండ్ స్కోర్ అందించిన తమన్‌ను ప్రాజెక్టులోకి తీసుకుంటారనే వార్త సోషల్ మీడియాలో హల్ చల్ చేసింది. నిజానికి ‘సైరా’ మూవీకి ఏఆర్.రెహమాన్ కంటే ముందు ఎక్కువగా వినిపించిన పేరు తమన్. ఈ క్రేజీ ప్రాజెక్ట్ మూవీకి తమన్ సంగీతం అందిస్తున్నట్టు వార్తలు రాగా చివర్లో ఏఆర్.రెహమాన్ కన్ఫామ్ చేసింది చిత్రయూనిట్.

అయితే ‘సైరా’ మూవీ నుండి రెహమాన్ తప్పుకోవడంతో ఆ ప్లేస్‌ను తిరిగి తమన్‌తో భర్తీ చేస్తున్నారంటూ గత కొద్దికాలంగా సోషల్ మీడియాలో వార్తలు వస్తుండంతో వాటిపై స్పందించారు తమన్. తనకు ‘సైరా’మేకర్స్‌నుండి ఎలాంటి పిలుపు రాలేదని.. ఒకవేళ మీరు అనుకున్నట్లే ఆఫర్ వస్తే మొదట అభిమానులతో షేర్ చేసుకుంటానంటూ ‘సైరా’ నరసింహారెడ్డి‌పై క్లారిటీ ఇచ్చారు తమన్. మరి‘సైరా’ మోషన్ పోస్టర్‌కు అద్భుతంగా బ్యాక్ గ్రౌండ్ స్కోర్ అందించిన పాజిటివ్ రెస్పాన్స్ రాబట్టిన తమన్‌ను ఈ క్రేజీ ప్రాజెక్ట్‌లో అవకాశం దక్కుతుందో లేక రాక్ స్టార్ దేవీ శ్రీ ప్రసాద్ వైపు మొగ్గు చూపుతారో త్వరలోనే తేలనుంది.