హోలీ వేళ అల్లువారబ్బాయి అరాచకం!

అల్లు అర్జున్ అంటే మనకు ముందుగా గుర్తొచ్చేది ఆయన డ్యాన్సులు. అంతేనా.. బలిష్ఠమైన కండలు తిరిగిన బాడీ. తన కండల పవర్ ఎలా ఉంటుందో ‘సరైనోడు’ సినిమాలో బన్నీ చూపించాడు. ఇప్పుడు మరోసారి ‘నా పేరు సూర్య - నా ఇల్లు ఇండియా’లో చూపించబోతున్నాడు. ఇప్పటికే ఫస్ట్‌లుక్, ట్రైలర్, రెండు పాటలతో సినిమాపై అంచనాలు భారీగా పెరిగిపోయాయి. ఇప్పుడు కొత్తగా వచ్చిన పోస్టర్ మరింత ఆసక్తిని రేపుతోంది. నోట్లో సిగార్.. కండలు తిరిగిన బాడీ.. జీపులో స్టైల్‌గా.. అల్లువారబ్బాయి అరాచకం అనేలా ఉన్నాడు బన్నీ. హోలీ సందర్భంగా విడుదల చేసిన ఈ ‘పోస్టర్ ఇంపాక్ట్’ ప్రస్తుతం సోషల్ మీడియాలో హల్ చల్ చేస్తోంది.

ఇదిలా ఉంటే, ‘నా పేరు సూర్య’ సినిమా ద్వారా రచయిత వక్కంతం వంశీ దర్శకుడిగా పరిచయమవుతున్నారు. అను ఇమ్మానుయేల్ హీరోయిన్. యాక్షన్ కింగ్ అర్జున్, శరత్ కుమార్ కీలక పాత్రలు పోషిస్తున్నారు. కె.నాగబాబు సమర్పణలో, రామలక్ష్మీ సినీ క్రియేషన్స్ బ్యానర్‌పై శిరీష్ శ్రీధర్ నిర్మాతగా, బన్నీ వాసు సహ నిర్మాతగా ఈ చిత్రం తెరకెక్కుతోంది. నేటి (మార్చి 1) నుంచి హైదరాబాద్‌లో కీలక సన్నివేశాలు చిత్రీకరిస్తున్నారు. రామోజీ ఫిల్మ్ సిటీతో పాటు నగర పరిసర ప్రాంతాల్లో ఈ సన్నివేశాలు షూట్ చేస్తున్నారు. నిర్మాణాంతర కార్యక్రమాలు త్వరగా పూర్తిచేసి ప్రపంచవ్యాప్తంగా మే 4న చిత్రాన్ని విడుదల చేయనున్నట్లు నిర్మాతలు ప్రకటించారు. బాలీవుడ్ సంగీత ద్వయం విశాల్ - శేఖర్ ఈ చిత్రానికి సంగీతం అందిస్తున్నారు.