మహేశ్ బాబు, అల్లు అర్జున్ చిత్రాల మధ్య క్లాష్ తప్పదా ?

సూపర్ స్టార్ మహేష్ బాబు, స్టైలిష్ స్టార్ అల్లు అర్జున్‌ల మధ్య బాక్సాఫీస్ వార్ తప్పదా అంటే అవుననే అంటున్నాయి ట్రేడ్ వర్గాలు. అందుకు కారణం ఆ ఇద్దరు హీరోల అప్‌కమింగ్ చిత్రాలు ఒకే రోజు రిలీజ్ కానుండటమే. అవును మహేష్ బాబు హీరోగా తెరకెక్కుతున్న భరత్ అనే నేను చిత్రాన్ని ఏప్రిల్ 27న రిలీజ్ చేస్తామని ఇటీవలే ఆ మూవీ మేకర్స్ ప్రకటించారు. దీంతో అదే సీజన్‌లో రిలీజ్ కావాల్సి వున్న నా పేరు సూర్య సినిమా మే నెలకు వాయిదా పడే అవకాశాలున్నాయని భావించారంతా. కానీ అందరి అంచనాలని మార్చేస్తూ తమ సినిమాను కూడా ఏప్రిల్ 27నే రిలీజ్ చేయనున్నట్టు తాజాగా నా పేరు సూర్య నిర్మాతల్లో ఒకరైన బన్నీ వ్యాస్ తేల్చిచెప్పారు.

బన్నీ వ్యాస్ చేసిన ప్రకటనతో భరత్ అనే నేను, నా పేరు సూర్య చిత్రాల మధ్య పోటీ తప్పదని స్పష్టమైంది. కాకపోతే అందుకు ఇంకా ఆరు నెలల సమయం మిగిలి వున్నందున ఆలోగా ఏదైనా ఇతరత్రా కారణాల వల్ల ఆ రెండు చిత్రాల రిలీజ్ తేదీలు మారే అవకాశం లేకపోలేదనే వాళ్లూ లేకపోలేదు. గతంలో అనేక సినిమాల విషయంలో అలా జరిగిన సందర్భాలని ఇక్కడ వాళ్లు గుర్తు చేసుకుంటున్నారు.