అక్కినేని వారింట పెళ్లిబాజాలకు డేట్ ఫిక్స్!

అక్కినేని అభిమానులకు శుభవార్త. మీరంతా ఎప్పుడెప్పుడా అని ఎదురుచూస్తున్న నాగచైతన్య, సమంతల పెళ్లికి ముహూర్తం పెట్టేశారు. అక్టోబర్ 6న ఈ ప్రేమ జంట వివాహం జరగనుంది. ఈ విషయాలను నాగచైతన్య స్వయంగా గురువారం వెల్లడించారు. హిందూ, క్రైస్తవ సంప్రదాయాల ప్రకారం పెళ్లి జరగనున్నట్లు తెలిపారు. పెళ్లి గోవాలో ఉంటుందని చెప్పారు. చైతు, సామ్‌ల నిశ్చితార్థం జనవరి 29న హైదరాబాద్‌లో అంగరంగ వైభంగా జరిగిన విషయం తెలిసిందే.

వాస్తవానికి చైతు-సామ్‌ల పెళ్లి అక్టోబర్‌లో ఉంటుందని ఎప్పటి నుంచో రూమర్లు వస్తున్నాయి. ప్రస్తుతం ఖరారు చేసిన అక్టోబర్ 6వ తేదీ కూడా రెండు వారాల క్రితమే బయటికొచ్చేసింది. కానీ దీన్ని చాలా మంది నమ్మలేదు. నాగ చైతన్య, సమంత వారివారి ప్రాజెక్టులతో బిజీగా ఉన్నారని, పెళ్లి ఈ ఏడాది ఉండదనే వార్తలు కూడా వినిపించాయి. మొత్తానికి వీటన్నిటీ నాగచైతన్య బ్రేక్ వేశారు. పెళ్లి తేదీని అధికారికంగా ప్రకటించి అక్కినేని అభిమానుల్లో ఉత్సాహాన్ని తీసుకొచ్చారు.