మరో ఆప్షన్ లేక సమంతను చేసుకున్నా: నాగచైతన్య

పదేళ్లుగా ఒకరి గురించి ఒకరు తెలుసుకున్న తరవాత సమంతను చేసుకోవాల్సి వచ్చిందని, తనకు మరో ఆప్షన్ కనబడలేదని హీరో నాగచైతన్య వ్యాఖ్యానించారు. వెంటనే స్పందించిన సమంత ‘బాబూ మీ గురించి బయట చాలా బ్యాడ్‌గా విన్నాం’ అంటూ నవ్వేసింది. ఈ సరదా ఘటన ‘చి ల సౌ’ ప్రెస్ మీట్‌లో చోటుచేసుకుంది. సుశాంత్, రుహానీ శర్మ జంటగా రాహుల్ రవింద్రన్ దర్శకత్వంలో తెరకెక్కిన చిత్రం ‘చి ల సౌ’. ఆగస్టు 3న విడుదలవుతోంది. ఈ సందర్భంగా మంగళవారం హైదరాబాద్‌లో ప్రెస్ మీట్ నిర్వహించారు. ప్రెస్ మీట్‌లో భాగంగా నాగచైతన్య, సమంత పెళ్లి ప్రయాణం గురించి చైతూని రాహుల్ రవింద్ర అడిగారు.

చైతన్య మాట్లాడుతూ.. ‘ఏడేళ్లపాటు ట్రై చేస్తూనే వచ్చాను. ఫైనల్‌గా ఆఖరి రెండేళ్లు.. సరే బాగానే కష్టపడుతున్నాడు వీడు అని సమంత ఓకే చెప్పేసింది’ అని అన్నారు. దీనికి సమంత నవ్వుతూ ‘పబ్లిక్‌గా ఇక్కడ అబద్ధం చెబుతున్నారు’ అని రాహుల్‌ను సాక్ష్యంగా పిలిచారు. ఇక మైక్ అందుకున్న రాహుల్.. ‘నేను వెంటపడ్డాను, చాలా కష్టపడ్డాను అని మీరంటున్నారు. నాకు సామ్ కూడా అదే చెప్పింది. మరి ఇద్దరూ కష్టపడి.. ఇద్దరూ ఒప్పుకోకపోవడమేంటి. అసలు సమస్యేంటి?’ అని ప్రశ్నించారు. దీనికి సమంత సమాధానం చెబుతూ.. ‘నా వెంట పడింది కేవలం చైతూ మాత్రమే. కానీ చైతూ వెంట చాలా మంది అమ్మాయిలు పడ్డారు. ఏడేళ్ల తరవాత నా టోకెన్ వచ్చింది’ అంటూ నవ్వుతూ చెప్పారు.

అయితే సమంత చెప్పినట్టు తన జీవితంలో చాలా మంది అమ్మాయిలైతే లేరని, అదంతా మసాలా అని చైతన్య కొట్టిపారేశారు. అందరికీ ఒక సమయం వస్తుందని, మాకు కూడా ఆ టైమ్ వచ్చి మా సంబంధాన్ని పెళ్లి వరకు తీసుకొచ్చామని చైతన్య చెప్పారు. ఇక సినిమా గురించి మాట్లాడుతూ.. కథ చాలా బాగుందని, కానీ ఎక్కడో చిన్న డౌట్ ఉండేదని అన్నారు. ‘సినిమా అంతా ఒక రాత్రిలో జరుగుతుంది. పెళ్లిచూపులు జరుగుతాయి, హీరోహీరోయిన్లు లవ్‌లో పడతారు, ఆ తరవాత వాళ్లిద్దరూ కలసి ఒక రాత్రి జర్నీ చేస్తారు. ఇదంతా ఆడియన్స్ నమ్ముతారు. ఈ స్క్రీన్‌ప్లే నచ్చుతుందా అనే డౌట్ ఉండేది. కానీ సినిమా చూశాక ఇందులో నేనూ భాగమైతే బాగుండు అనిపించింది. అంత బాగా నచ్చింది’ అని చైతన్య చెప్పారు.