ఏఎన్నార్‌ బయోపిక్‌లో చేయలేను: నాగ చైతన్య

ఏఎన్నార్‌ బయోపిక్‌ తీస్తే బాగుంటుంది.. కానీ.. తాతగారి పాత్రని తాను చేయలేనని అక్కినేని నాగచైతన్య వెల్లడించాడు. ఇటీవల విడుదలైన ‘మహానటి’ సినిమాలో ఏఎన్నార్‌గా కాసేపు తెరపై అలరించిన ఈ అక్కినేని హీరో.. ప్రస్తుతం ‘చి.ల.సౌ’ సినిమాకి సహ నిర్మాతగా వ్యవహరిస్తున్నాడు. ఈ సందర్భంగా మీడియాతో కాసేపు ముచ్చటించాడు. ‘చి.ల.సౌ’ సినిమాకి రాహుల్ రవీంద్రన్ దర్శకత్వం వహిస్తుండగా.. సుశాంత్‌ హీరోగా నటిస్తున్నాడు. ఈ చిత్రం ఈనెల 27న విడుదల కానుంది.

‘రాహుల్ రవీంద్రన్‌ సమంతకి మంచి ఫ్రెండ్. ‘చి.ల.సౌ’ సినిమా మొదలవకముందే నాకు ఈ కథ చెప్పాడు. చాలా కొత్తగా ఉందనిపించింది. ఆ తర్వాత.. షూటింగ్‌ పూర్తయ్యాక సినిమా చూపించాడు. ఇలాంటి మంచి సినిమాకి అన్నపూర్ణ స్టూడియో లాంటి సంస్థ సపోర్ట్ ఉంటే బాగుంటుందనిపించి.. వెంటనే నిర్మాతని అడిగి భాగస్వామిగా చేరాను. తాతగారి బయోపిక్‌ గురించి చాలా మంది అడుగుతున్నారు. తీస్తే బాగుంటుంది. కానీ.. నేను మాత్రం తాతగారి పాత్రలో చేయలేను. మహానటి సినిమా‌లో చేయడానికే తెగ బయపడిపోయాను. అలాంటిది.. పూర్తి స్థాయిలో చేయడమంటే కష్టమే’ అని నాగచైతన్య వెల్లడించాడు.