అలసిపోయినంత మాత్రాన ఆపను: నాగశౌర్య

టాలీవుడ్‌లో ప్రస్తుతం ప్రతిభావంతులైన నటుల్లో యంగ్ హీరో నాగశౌర్య ఒకరు. లవర్ బోయ్‌గా కెరీర్‌ను ప్రారంభించిన నాగశౌర్య.. ఇప్పుడు మాస్ హీరోగా ఇమేజ్‌ను క్రియేట్ చేసుకునే ప్రయత్నంలో ఉన్నారు. ఈ ఏడాది ‘అశ్వథ్థామ’ వంటి క్రైమ్ థ్రిల్లర్‌తో ప్రేక్షకుల ముందుకు వచ్చిన నాగశౌర్య ఆశించిన స్థాయిలో ఆకట్టుకోలేకపోయారు. కమర్షియల్ హీరోగా నాగశౌర్యకు మార్కులు పడినా సినిమా మాత్రం విమర్శకుల ప్రశంసలు అందుకోలేపోయింది. అయితే, ఇప్పుడు మరో కమర్షియల్ మూవీతో ప్రేక్షకుల ముందుకు వచ్చే ప్రయత్నాల్లో ఉన్నారు నాగశౌర్య.

Also Read: ఐఏఎస్ అధికారిగా సాయి ధరమ్ తేజ్!

ప్రస్తుతం నాగశౌర్య తన బాడీని ట్రాన్స్‌ఫార్మ్ చేసే పనిలో ఉన్నారు. ‘అశ్వథ్థామ’లో కండలు తిరిగిన దేహంతో కనిపించిన నాగశౌర్య.. ఇప్పుడు మరింత ఎక్కువగా కసరత్తులు చేస్తున్నారు. ఈ మేరకు సోమవారం ఆయన ట్విట్టర్‌లో ఒక వీడియోను పెట్టారు. ఈ వీడియోలో నాగశౌర్య పుల్ అప్స్ చేస్తూ కనిపించారు. ‘‘నేను అలసిపోయినంత మాత్రాన ఆపను, అనుకున్నది పూర్తయితేనే ఆపుతాను’’ అని ఆ ట్వీట్‌లో నాగశౌర్య పేర్కొన్నారు. పుల్ అప్స్ అనేవి అప్పర్ బాడీ ఎక్సర్‌సైజ్. భుజబలాన్ని పెంచడానికి, వెనుక కండరాలను దృఢంగా చేయడానికి ఈ ఎక్సర్‌సైజ్ ఉపయోగపడుతుంది.
కాగా, 2011లో వచ్చిన ‘క్రికెట్ గర్ల్ అండ్ బీర్’ చిత్రంతో నాగశౌర్య హీరోగా పరిచయమయ్యారు. అయితే, 2014లో వచ్చిన ‘ఊహలు గుసగుసలాడే’ చిత్రంతో నాగశౌర్యకు మంచి గుర్తింపు వచ్చింది. ఈ సినిమాలో రాశీ ఖన్నా హీరోయిన్. ఈ సినిమా తరవాత వరుస హిట్లతో తన ఇమేజ్‌ను నాగశౌర్య పెంచుకుంటూ వచ్చారు. ‘దిక్కులు చూడకు రామయ్య’, ‘కళ్యాణ వైభోగమే’, ‘జ్యో అచ్యుతానంద’ వంటి సినిమాలతో అలరించారు. ‘ఛలో’ సినిమాతో నిర్మాతగా కూడా మారారు. ఐరా క్రియేషన్స్ బ్యానర్‌ను స్థాపించి, తన తల్లి ఉషా మూల్పూరిని నిర్మాతగా పెట్టి సినిమాలు నిర్మిస్తున్నారు. ఈ బ్యానర్‌లో ఇప్పటి వరకు ‘ఛలో’, ‘నర్తనశాల’, ‘అశ్వథ్థామ’ చిత్రాలు వచ్చాయి. వీటిలో ‘ఛలో’ సూపర్ హిట్ అయ్యింది.