కత్తి మహేష్‌కు నాగబాబు వార్నింగ్!

శ్రీ రాముడిపై అనుచిత వ్యాఖ్యలు చేసిన కత్తి మహేష్‌పై మెగా బ్రదర్‌ నాగబాబు విరుచుకుపడ్డారు. నాస్తికత్వం పేరుతో హిందువుల జోలికి వస్తే శిక్ష అనుభవిస్తారని.. మత విశ్వాసాలను కించపరిచే విధంగా మాట్లాడితే ఊరుకునేది లేదని నాగబాబు బుధవారం (జులై 4) హెచ్చరించారు. ఏ మతాన్ని కించపరిచినా తప్పేనని ఆయన అన్నారు. క్రైస్తవులకు బైబిల్‌, ముస్లింలకు ఖురాన్‌ మాదిరిగానే హిందువులకు రామాయణం, మహాభారతం అలాంటివన్నారు. ఈ విషయంపై రాజకీయ పార్టీలు ఎందుకు స్పందించడంలేదని ప్రశ్నించారు.

హిందూ మతం, హిందూ దేవతలపై పథకం ప్రకారం దాడి జరుగుతోందని నాగబాబు ఆరోపించారు. ఏ ఒక్కరు కూడా మతపరమైన చర్చలను ప్రోత్సహించవద్దని సూచించారు. హిందువుల మనోభావాలను కించపరిచిన ఆ నీచుడిపై పోలీసులు వెంటనే చర్యలు తీసుకోవాలని ఆయన డిమాండ్ చేశారు. తెలంగాణ సీఎం కేసీఆర్, ఏపీ సీఎం చంద్రబాబు కూడా ఈ విషయంలో స్పందించి.. చర్యలు తీసుకోవాలని కోరారు.

ఇలాంటి వ్యక్తిని ఉపేక్షిస్తే.. చట్టాన్ని ప్రజలు చేతుల్లోకి తీసుకోవాల్సి ఉంటుందని హెచ్చరించారు. లేకపోతే చారిత్రాత్మక తప్పు చేసిన వారవుతారని నాగబాబు అన్నారు. హిందూ మతంపై పథకం ప్రకారం దాడి జరుగుతోందన్నారు. పోలీసులు, న్యాయవ్యవస్థ ఈ విషయంలో కఠినంగా వ్యవహరించాల్సి ఉంటున్నారు.