మేనమామ ఇంట్లో చైతూ ప్రైవేట్ రిసెప్షన్ పార్టీ

నాగ చైత‌న్య‌-స‌మంత‌ల జంట పెళ్లికి ముందు ఎలాగైతే నిత్యం వార్తల్లో వుందో అలాగే పెళ్ళి తర్వాత కూడా అనుక్షణం ఎంటర్‌టైన్‌మెంట్ హెడ్‌లైన్స్‌లో నిలుస్తోంది. పెళ్లి అయ్యే వరకు ఆ ఇద్దరి పెళ్లిపై ఫోకస్ పెట్టిన అభిమానులు, మీడియా.. ఇప్పుడు తమ ఫోకస్‌ని వాళ్ల రిసెప్షన్‌పైకి మార్చాయి. అతికొద్ది మంది బంధుమిత్రుల స‌మ‌క్షంలో పెళ్లి చేసుకున్నారు కనుక రిసెప్షన్ అయినా అంగరంగ వైభవంగా అన్నిరంగాల ప్రముఖులని అతిధులుగా ఆహ్వానించి, వేడుకగా జరుపుకోవాలని రెండు కుటుంబాలు భావిస్తున్నాయనే సంగతి తెలిసిందే.

అయితే, అంతకన్నా ముందుగానే నాగ చైతన్య తల్లి లక్ష్మీ తన సోదరుడు ద‌గ్గుబాటి సురేష్ బాబు ఇంట్లో ప్రైవేటుగా అత్యంత సన్నిహిత బంధుమిత్రుల మధ్య రిసెప్ష‌న్‌ని ఏర్పాటు చేసిందట‌. చైతు మేన మామ దగ్గుబాటి సురేష్ బాబు ఈ వేడుక‌ని ఘ‌నంగానే సెలబ్రేట్ చేసినట్టు సమాచారం. నెల్లూరు, కారంచేడు, గుంటూరు, రాజమండ్రి పరిసర ప్రాంతాల నుండి దగ్గుబాటి వారి కుటుంబానికి చెందిన సమీప బంధువులు కూడా వ‌చ్చార‌ని తెలుస్తోంది. ఇక మిగిలిందల్లా అధికారికంగా నిర్వహించాల్సి వున్న రిసెప్షన్ మాత్రమే.