ప్రేక్షకులకు కొత్త తరహా చిత్రాలను అందించాలనుకునే హీరోల్లో నాగ్ ఎప్పుడూ ముందుంటారు. అందుకనే ఆయన కమర్షియల్ సినిమాలతో పాటు భక్తిరస చిత్రాల్లోనూ నటించారు. ఫ్యామిలీ ఆడియెన్స్కు నచ్చే సినిమాలతో అలరించారు. యూత్ని మెప్పించే ప్రేమకథా చిత్రాలు చేసి ఇమేజ్ చట్రంలో ఇరుక్కపోలేదు. అభిమానులను అలరిస్తూనే వైవిధ్యమైన పాత్రల్లో నటించారు. 1986లో విక్రమ్ సినిమాతో హీరోగా కెరీర్ స్టార్ట్ చేశారు నాగార్జున. కెరీర్ ప్రారంభం నుంచి వైరైటీ చిత్రాల్లో నటిస్తూ వచ్చారు. తండ్రితో కలిసి అగ్నిపుత్రుడు, కలెక్టర్గారి అబ్బాయి వంటి చిత్రాల్లో పోటీ పడి నటించారు.
శివ.. గీతాంజలిలతో సెన్సేషన్
మణిరత్నం దర్శకత్వంలో నాగ్ చేసిన గీతాంజలి ఎవర్గ్రీన్ లవ్స్టోరీస్ ఆఫ్ టాలీవుడ్గా ఇప్పటికీ నిలిచపోయింది. ఇది విడుదలైన ఐదు నెలల్లోనే శివ వంటి మరో కాలేజ్ బ్యాక్ డ్రాప్ మూవీ చేశారాయన. ఇక శివ ఎలాంటి సక్సెస్ దక్కించుకుందో ప్రత్యేకంగా చెప్పనక్కర్లేదు. సెన్సేషనల్ డైరెక్టర్ రామ్ గోపాల్ వర్మను సినీ ఇండస్ట్రీకి పరిచయం చేసిన వ్యక్తిగా నాగార్జున క్రెడిట్ దక్కించుకున్నారు. ఇక శివ సినిమా గురించి ప్రత్యేకంగా చెప్పనక్కర్లేదు. అందులో హీరో సైకిల్ చైన్ తెంపే మాస్ సీన్ను మించి మరో సీన్ రాలేదంటే అతిశయోక్తి కాదేమో అని చెప్పాలి. ఇక తెలుగు సినిమా పంథాను మార్చిన సినిమాగా.. సౌండ్ టెక్నిక్స్ను సరికొత్తగా తెలుగు ప్రేక్షకులకు పరిచయం చేసిన చిత్రంగా ఇది ఎవర్ గ్రీన్ మూవీగా నిలిచిపోయింది. చాలా మంది దర్శకులను ఇన్స్పైర్ చేసిన సినిమా ఇది.
పరిచయం చేసిన కొత్త దర్శకులు
శివ సినిమాతో తెలుగు సినిమాకు రామ్ గోపాల్ వర్మను పరిచయం చేసిన నాగార్జున తర్వాత మలయాళ దర్శకుడు ప్రియదర్శన్తో నిర్ణయం సినిమా చేశారు. తర్వాత చైతన్య చిత్రంతో ప్రతాప్ పోతన్ను ఇంట్రడ్యూస్ చేశారు. శాంతి క్రాంతి చిత్రంతో రవిచంద్ర.. ప్రేమ యుద్ధంతో రాజేంద్ర సింగ్ బాబులను పరిచయం చేశారు. ఇక ప్రముఖ బాలీవుడ్ దర్శక నిర్మాతతతో క్రిమినల్ సినిమా చేశారు. సొగ్గాడే చిన్ని నాయనాతో కళ్యాణ్ కృష్ణను పరిచయం చేశారు. దర్శకులే కాదు.. చాలా సాంకేతిక నిపుణులతో కలిసి నాగార్జున తెలుగు సినిమాలను కొత్త పుంతలు తొక్కించే ప్రయత్నం చేశారు.
సక్సెస్ఫుల్ నిర్మాత..
హీరోగానే కాదు.. నాగార్జున సక్సెస్ఫుల్ నిర్మాతగా పేరు తెచ్చుకున్నారు. కొత్తదనం ఉన్న చిత్రాలకు ప్రాధాన్యం ఇస్తూ దర్శకులను ఎంకరేజ్ చేశారు. పరిమితులు మించకుండా సినిమాలు చేసి హిట్ కొట్టే నిర్మాతగా నాగార్జునకు ఇండస్ట్రీలో మంచి పేరుంది. తండ్రి స్థాపించిన అన్నపూర్ణ స్టూడియోస్ బాధ్యతలను కుటుంబం సభ్యులతో కలిసి ముందుకు తీసుకెళుతున్నారు. ఇప్పుడు తన నట వారసులుగా నాగ చైతన్య, అఖిల్ను ఇండస్ట్రీకి తీసుకొచ్చారు. వారితో కలిసి సినిమాలు చేస్తున్నారు నాగార్జున.
హోస్ట్గా సక్సెస్
కొత్తదనంతో ఉండాలని, ప్రేక్షకులను ఆకట్టుకోవాలనేది నాగ్ ఆలోచన. అందుకనే హీరోగానే కాదు.. బుల్లి తెరపై కూడా అలరించారు. టాలీవుడ్ హీరోలకు మార్గదర్శకం చేస్తూ మీలో ఎవరు కోటీశ్వరుడు అనే కార్యక్రమాన్ని విజయవంతంగా ముందుకు నడిపారు. ఇప్పుడు తెలుగు రియాలిటీ షోను హోస్ట్ చేస్తున్నారు. బిగ్ బాస్ తెలుగు షో మూడో సీజన్ నుంచి నాగ్ హోస్ట్ చేస్తున్నారు. తనదైన యాంకరింగ్ స్టైల్తో ఆ ప్రోగ్రామ్ను టాప్లో నిలబెడుతున్నారు. ఈ షో చేస్తూనే సినిమాల్లో నటిస్తూ బిజీగా ఉంటున్నారు.
పాన్ ఇండియా మూవీ బ్రహ్మాస్త్ర చిత్రంలో అమితాబ్, రణ్భీర్, ఆలియా భట్లతో కలిసి నటించారు. ఆ చిత్రంతో సెప్టెంబర్ 9న సందడి చేయనుంది. దీంతో పాటు ఫుల్ యాక్షన్ ఎంటర్టైనర్గా రూపొందుతోన్న ది ఘోస్ట్ చిత్రంతో సందడి చేయబోతున్నారు. హీరోగా, నిర్మాతగా, హోస్ట్, స్టూడియో అధినేతగా, మంచి మనసున్న వ్యక్తిగా మన్ననలు అందుకుంటున్న నాగార్జున పుట్టినరోజు నేడు (ఆగస్ట్ 29). ఆయన ఇలాంటి పుట్టినరోజులను ఎన్నింటినో సెలబ్రేట్ చేసుకోవాలని మనస్ఫూర్తిగా కోరుకుందాం..
Nagarjuna Akkineni
నాగార్జున అక్కినేని