నాగార్జునకి డైరెక్టర్‌పై కోపమొచ్చింది

కింగ్ నాగార్జునకి ఓ డైరెక్టర్‌పై కోపమొచ్చింది. ఎంత కోపమంటే, తన కొడుకు హీరోగా తాను నిర్మిస్తున్న సినిమాను అనుకున్న విధంగా ఆ డైరెక్టర్ తెరకెక్కించలేదనే ఆగ్రహంతో, ప్రస్తుతం అన్నీ తానై ఆ సినిమాను దగ్గరుండి పర్యవేక్షించేంతంగా కోపమొచ్చిందట! ఇంతకీ ఆ డైరెక్టర్ ఎవరో కాదు... 'సోగ్గాడే చిన్నినాయన' లాంటి సినిమాతో తనకి ఓ బ్లాక్‌బస్టర్ హిట్‌ని అందించిన కళ్యాణ్ కృష్ణ కురసాలనే.

అవును.. కళ్యాణ్ కృష్ణ కురసాల ప్రస్తుతం నాగచైతన్య హీరోగా రారండోయ్ వేడుక చూద్దాం సినిమాను డైరెక్ట్ చేస్తున్న సంగతి తెలిసిందే. ఈ సినిమాను నిర్మిస్తున్న నాగ్.. నిన్నే పెళ్లాడతా, మన్మథుడు వంటి చిత్రాల తరహాలో ఇదో రొమాంటిక్ లవ్ ఎంటర్‌టైనర్ అవుతుందని ఆశిస్తున్నారు. అంతేకాకుండా అటు చైతూ కెరీర్ పరంగా, సినిమా నిర్మాణం పరంగా రారండోయ్ వేడుక చూద్దాంపై ఎన్నో అంచనాలు పెట్టుకున్నారు.

అయితే, ఇటీవలే పూర్తయిన ఈ సినిమా ఫైనల్ కాపీని చూసిన నాగ్‌కి అది తాను ఆశించిన విధంగా లేదని అనిపించిందట. ఫైనల్ కాపీపై సంతృప్తి పొందని నాగ్ మళ్లీ రీషూట్‌కి వెళ్లమని చెప్పి ఆ సినిమాని తానే దగ్గరుండి ఎడిట్ చేయిస్తున్నట్టు సినీవర్గాలు చెబుతున్నాయి. దీంతో రారండోయ్ వేడుక చూద్దాం సినిమా విడుదల ఇంకొంత ఆలస్యం అవవచ్చనే టాక్ వినిపిస్తోంది. అందుకు తగినట్టుగానే మేకర్స్ కూడా అధికారికంగా ఏ వివరాలు ప్రకటించకపోవడం ఈ ప్రచారాన్ని ఇంకొంత బలపరుస్తోంది. ఫైనల్ కాపీతో నాగ్ సంతృప్తి పొందితే కానీ ఆ వివరాలు బయటికొచ్చే ఛాన్స్ లేదు.