వైఎస్సార్‌గా నాగార్జున కాదు, కానీ..

మహీ వీ రాఘవ్ దర్శకత్వంలో రూపొందించ తలబెట్టిన దివంగత ముఖ్యమంత్రి వైఎస్ రాజశేఖర రెడ్డి బయోపిక్ లో టైటిల్ రోల్ కోసం నాగార్జునను సంప్రదించడం రూమర్ అని తేలిపోయింది. వైఎస్ పాత్రలో నాగార్జున నటించబోతున్నాడన్న ప్రచారాన్ని ఆ సినిమా యూనిట్ ఖండించింది. అసలు వైఎస్ పాత్ర కోసం నాగార్జునను సంప్రదించిందే లేదని స్పష్టం చేసింది.

అయితే ఈ పాత్ర కోసం మలయాళ స్టార్ హీరో మమ్ముట్టీని సంప్రదించినట్టుగా మాత్రం తెలుస్తోంది. నాగార్జునను అడగలేదు అని చెప్పిన ఈ యూనిట్ మమ్ముట్టీ రెస్పాన్స్ కోసం చూస్తున్నట్టుగా ఉంది. ఈ సినిమాలో నటించబోయేదెవరెవరు అనే అంశం గురించి మహీ వీ రాఘవ్ త్వరలోనే ప్రకటిస్తారని తెలుస్తోంది.

వైఎస్ బయోపిక్ కోసం ఆయన తనయుడు, వైఎస్సార్సీపీ అధినేత జగన్ మోహన్ రెడ్డిని కలవనున్నాడట ఈ దర్శకనిర్మాత. ఇది వరకూ వైఎస్ జీవిత కథ ఆధారంగా పలు సినిమాలు వచ్చిన సంగతి తెలిసిందే. అయితే అవేవీ అంతగా జనాల్లోకి వెళ్లలేదు. వినోద్ కుమార్ వైఎస్ గా నటించగా కూడా వైఎస్ బయోపిక్ ఒకటి వచ్చింది. పూరీ జగన్నాథ్ దర్శకత్వంలో వైఎస్ జీవిత కథ ఆధారంగా ఒక సినిమా వస్తుందనే ప్రకటన అప్పట్లో వచ్చినా..అది కార్యరూపం దాల్చలేదు.