వర్మపై నాగ్ ‘షాకింగ్’ ట్వీట్!

రామ్ గోపాల్ వర్మతో నాగార్జున సినిమా అంటే.. అందరికీ 28 ఏళ్ల కిందటి ‘శివ’ సినిమా ఫ్లాష్ అవుతోంది. ఔను నిజమే.. అప్పట్లో వర్మతో నాగార్జున ‘శివ’ సినిమా తీస్తున్నారంటే చాలామంది షాకయ్యారని స్వయంగా నాగార్జునే చెబుతున్నారు. అయితే, అప్పటి రామ్ గోపాల్ వర్మకు, ఇప్పటి వర్మకు చాలా వ్యత్యాసమే ఉంది. అప్పట్లో ఆర్జీవీ పట్టిందల్లా బంగారంలా ఉండేది. అయితే, ఇటీవల ఆయన సినిమాల్లో కంటే వివాదాలతోనే ఎక్కువగా సావాసం చేస్తున్నారు. సంచలనాత్మక సినిమాలతో తరచుగా వార్తల్లో ఉంటున్న ఆర్జీవీతో నాగ్ మళ్లీ జత కడుతున్నారంటే సర్వాత్ర ఆసక్తి నెలకొంది. ఈ సందర్భంగా నాగార్జున ట్విట్టర్‌లో తన అభిప్రాయాన్ని వెల్లడించారు.

‘‘1988లో నేను ఆర్జీవీతో ‘శివ’ సినిమాకు ఒప్పుకున్నప్పుడు చాలా మంది షాకయ్యారు. అయితే, ఆయన వారి ఆలోచనలు తప్పని నిరూపించారు. 2017లో ఆయనతో మళ్లీ సినిమా అనేసరికి చాలా మంది సంతోషం వ్యక్తం చేశారు, అలాగే షాక్ కూడా అయ్యారు. లెట్స్ రాక్ రామూ’’ అంటూ ట్వీట్ చేశారు. అంటే, రామూపై ఎంత నమ్మకం ఉందో నాగార్జున ట్వీట్ చూస్తే అర్థమవుతోంది. మరి, ఆర్జీవీ మళ్లీ ‘ట్రెండ్’ సెట్ చేస్తారో లేదో చూడాలి. నవంబరు 20 నుంచి వీరి సినిమా షూటింగ్ ప్రారంభం కానుంది.
pic.twitter.com/iR1uqlZvgD — Nagarjuna Akkineni (@iamnagarjuna) November 3, 2017