Balakrishna: బోయ‌పాటితో బాల‌య్య ‘లెజెండ్ 2’.. 2024 ఎలక్షన్ టార్గెట్

Nandamuri Balakrishna - Boyapati Sreenu: నందమూరి బాలకృష్ణ నెక్ట్స్ మూవీపై అంద‌రిలో ఆస‌క్తి నెల‌కొంది. ప్ర‌స్తుతం ఆయ‌న‌ అనీల్ రావిపూడితో త‌న 108వ సినిమా చేస్తోన్న సంగ‌తి తెలిసిందే. బోయ‌పాటి శ్రీనుతో పాటు డైరెక్ట‌ర్ బాబీ, వేణు ఎల్దండి వంటి డైరెక్ట‌ర్స్‌తో బాల‌య్య నెక్ట్స్ మూవీ చేస్తార‌నే వార్త‌లు వినిపించాయి. కానీ ఇండ‌స్ట్రీ వ‌ర్గాల స‌మాచారం మేర‌కు బాలకృష్ణ త‌న 109వ చిత్రాన్ని బోయపాటి శ్రీనుతోనే చేయ‌బోతున్నార‌ట‌. అందుకు కార‌ణం..2024 ఎన్నిక‌లు. ఇప్ప‌టికే వీరిద్ద‌రి కాంబినేష‌న్‌లో మూడు సినిమాలు వ‌చ్చాయి. సింహ‌, లెజెండ్‌, అఖండ చిత్రాలు మూడు బ్లాక్ బ‌స్ట‌ర్ మూవీస్‌గా నిలిచాయి.

బాల‌కృష్ణ‌, బోయ‌పాటి శ్రీను కాంబినేష‌న్‌లో BB4 మూవీ చేస్తే అది అఖండ 2 అవుతుంద‌నే వార్త‌లు కూడా ఆమ‌ధ్య నెట్టింట వైర‌ల్ అయ్యాయి. అయితే తాజాగా BB4కి సంబంధించి ఆసక్తిక‌ర‌మైన న్యూస్ ఒక‌టి బ‌య‌ట‌కు వ‌చ్చింది. అదేంటంటే బోయ‌పాటి ఈ చిత్రాన్ని అఖండ 2గా కాకుండా లెజెండ్ 2గా తెర‌కెక్కిస్తారంటున్నారు. ఇంత‌కు ముందు వీరిద్ద‌రూ చేసిన లెజెండ్ సినిమాను గ‌మ‌నిస్తే.. బాల‌య్య క్లైమాక్స్‌లో ఎమ్మెల్యేల‌తో రాజ‌కీయాల గురించి డిస్క‌స్ చేస్తారు. దీనికి కొన‌సాగింపు పాయింట్ నుంచి లెజెండ్ 2 రూపొందే అవ‌కాశం ఉందనే మాటలు గ‌ట్టిగానే వినిపిస్తున్నాయి.

జూన్ 10న నంద‌మూరి బాల‌కృష్ణ పుట్టిన‌రోజు.. అప్పుడు BB4 సినిమాను అధికారికంగా ప్ర‌క‌టిస్తారు. ఎక్కువ గ్యాప్ తీసుకోకుండా జూలై నుంచే రెగ్యుల‌ర్ షూటింగ్‌ను స్టార్ట్ చేస్తారు. ఎన్నిక‌ల‌కు కొన్ని నెల‌ల ముందు సినిమాను రిలీజ్ అయ్యేలా ప్లాన్ చేస్తున్నారు. 14 రీల్స్ ప్ల‌స్ బ్యాన‌ర్‌లోనూ లెజెండ్ 2 ఉంటుంద‌ని సినీ స‌ర్కిల్స్ టాక్‌.

లెజెండ్ సినిమాలో సీనియర్ నటుడు జగపతిబాబు విలన్‌గా నటించి మెప్పించిన సంగతి తెలిసిందే. ఆ పాత్రను లెజెండ్‌లో చనిపోయేలా చూపించారు. మరి లెజెండ్ 2లో జగపతి బాబు రోల్ కొనసాగింపుగా వస్తుందా? లేక కొత్త కథాంశంతో ఫ్రాంచైజీగా చేస్తారేమో చూడాలి. ఆసక్తికరమైన విషయమేమంటే.. బోయపాటి ఇప్పటి వరకు బాలకృష్ణతో చేసిన సినిమాలన్నింటిలోనూ ఆయన్ని ద్విపాత్రాభినయంలోనే చూపించారు. మరి లెజెండ్ 2లోనూ దాన్ని కంటిన్యూ చేస్తారో లేదో మరి. ఈ ప్రశ్నలన్నింటికీ సమాధానం దొరకాలంటే వెయిటింగ్ తప్పదు.


ఇక ప్ర‌స్తుతం బాల‌కృష్ణ చేస్తోన్న NBK 108 మూవీ విష‌యానికి వ‌స్తే అనీల్ రావిపూడి ద‌ర్శ‌క‌త్వంలో హ‌రీష్ పెద్ది, సాహు గార‌పాటి ఈ చిత్రాన్ని నిర్మిస్తున్నారు. ద‌స‌రా సంద‌ర్భంగా అక్టోబ‌ర్ 20న ఈ మూవీ రిలీజ్ కానుంది. కాజ‌ల్ అగ‌ర్వాల్ హీరోయిన్‌గా న‌టిస్తోన్న ఈ చిత్రంలో హీరోయిన్ శ్రీలీల కీల‌క పాత్ర‌లో న‌టిస్తోంది.

Pushpa 2: ‘పుష్ప2’లో బాలీవుడ్ స్టార్ హీరో స్పెషల్ అప్పియరెన్స్!
Read Latest Tollywood Updates and Telugu News