RIP Krishna: కృష్ణగారితో కలిసి నటించటం మరచిపోలేని అనుభూతి.. సినీ ప‌రిశ్ర‌మ‌కు తీర‌ని లోటు: బాల‌కృష్ణ‌

సీనియ‌ర్ న‌టుడు, నిర్మాత‌, ద‌ర్శ‌కుడు అయిన సూప‌ర్‌స్టార్ కృష్ణ (Superstar Krishna) అనారోగ్యంతో మంగ‌ళ‌వారం తెల్ల‌వారు జామున క‌న్నుమూశారు. డేరింగ్ డాషింగ్ పర్స‌న్‌గా పేరు తెచ్చుకున్న ఆయ‌న ఎంతో ఉన్న‌త వ్య‌క్తిత్వంతో త‌న‌దైన ముద్ర వేశారు. ఆయ‌న మ‌ర‌ణం సినీ ఇండ‌స్ట్రీకి తీర‌నిలోటు. యావ‌త్ సినీ ప్ర‌పంచం కృష్ణ మ‌ర‌ణంపై సంతాపాన్ని వ్య‌క్తం చేస్తుంది. ఈ క్ర‌మంలో తెలుగు చిత్ర సీమకి చెందిన అగ్ర క‌థానాయ‌కుడు నంద‌మూరి బాల‌కృష్ణ స్పందించారు (Nandamuri Balakrishna). సంతాపాన్ని ప్ర‌క‌టించారు.

‘‘ఘట్టమనేని కృష్ణ‌గారి మ‌ర‌ణం తీవ్ర దిగ్భ్రాంతిని క‌లిగించింది. కృష్ణ‌గారు త‌న న‌ట‌న‌తో చిత్ర‌సీమ‌లో స‌రికొత్త ఒర‌వ‌ళ్లు సృష్టించి ఎన‌లేని ఖ్యాతిని సంపాదించి ప్రేక్ష‌కుల మ‌న‌సులో చెర‌గ‌ని ముద్ర వేశారు. న‌టుడిగా, నిర్మాతగా, ద‌ర్శ‌కుడిగా, స్టూడియో అధినేత‌గా చిత్ర ప‌రిశ్ర‌మ‌కు ఆయ‌న అందించిన సేవ‌లు మ‌రువ‌లేనిది. కృష్ణ‌గారితో మా కుటుంబానికి ఎంతో మంచి అనుబంధం ఉంది. నాన్న‌గారు, కృష్ణ‌గారు క‌లిసి అనేక చిత్రాల‌కు ప‌ని చేశారు. ఆయ‌న‌తో క‌లిసి నేను న‌టించ‌టం మ‌ర‌చిపోలేని అనుభూతి. కృష్ణ‌గారు లేని లోటు చిత్ర ప‌రిశ్ర‌మ‌కు, అభిమానుల‌కు ఎప్ప‌టికీ తీర్చ‌లేనిది. ఆయ‌న ఆత్మ‌కు శాంతికి చేకూర్చాల‌ని భ‌గ‌వంతుడిని ప్రార్థిస్తున్నాను. ఇటీవ‌లే సోద‌రుడు ర‌మేష్ బాబుని, మాతృమూర్తి ఇందిరాదేవిని కోల్పోయిన దుఃఖంలో ఉన్న నా సోదురుడు మ‌హేష్ బాబుకు ఈ క‌ష్ట కాలంలో దేవుడు మ‌నో ధైర్యాన్ని ఇవ్వాల‌ని కోరుకుంటూ..ఆయ‌న కుటుంబ స‌భ్యులంద‌రికీ నా ప్ర‌గాఢ సానుభూతిని తెలియజేస్తున్నాను’’ అన్నారు.

గుండెపోటుతో ఆదివారం అర్థ‌రాత్రి నాన‌క్ రామ్ గూడ‌లోని కాంటినెంట‌ల్ హాస్పిట‌ల్‌లో (Continental Hospitals) జాయిన్ అయ్యారు. వెంట‌నే ఐసీయూలో వెంటిలేట‌ర్‌పై ఉంచి డాక్ట‌ర్స్ ట్రీట్మెంట్ అందించారు. అయితే రెండు, మూడు గంట‌ల‌కు ఓసారి ఒక్కొక్క అవ‌య‌వం ఫెయిల్ అవుతూ వ‌చ్చింది. ప‌రిస్థితి చేయి దాట‌డంతో మంగ‌ళ‌వారం తెల్ల‌వారు జామున కృష్ణ క‌న్నుమూశారు.