కళ్యాణ్ రామ్ సినిమాకు ఆసక్తికర టైటిల్

నందమూరి హీరోల్లో బాలకృష్ణ, జూనియర్ ఎన్టీఆర్ తరవాత అంత క్రేజ్ ఉన్న హీరో కళ్యాణ్ రామ్. ఇటు నటుడిగా రాణిస్తూనే అటు నిర్మాతగా సినిమాలు నిర్మిస్తున్నారు. హీరోగా మూడేళ్ల క్రితం ‘పటాస్’ సినిమాతో మంచి కమర్షియల్ విజయం అందుకున్న కళ్యాణ్ రామ్.. తరవాత ఆ స్థాయి హిట్టు కొట్టలేకపోయారు. ఈ ఏడాది తమన్నతో జోడీగా జయేంద్ర దర్శకత్వంలో చేసిన ‘నా నువ్వే’ డిజాస్టర్‌గా మిగిలిపోయింది. తన శైలికి విరుద్ధంగా చేసిన ఈ ప్రయత్నం బెడిసికొట్టింది. దీంతో ఈసారి ఎలాగైనా హిట్టుకొట్టాలని ఓ వినూత్న కాన్సెప్ట్‌ను కళ్యాణ్ రామ్ ఎంచుకున్నారు. ‘నా నువ్వే’తో తీవ్రంగా నష్టపోయిన నిర్మాత మహేష్ ఎస్ కోనేరుతోనే ఈ సినిమా చేస్తున్నారు.

సినిమాటోగ్రాఫర్ నుంచి డైరెక్టర్‌గా మారిన కేవీ గుహన్ ఈ సినిమాకు దర్శకత్వం వహిస్తున్నారు. ఇది కళ్యాణ్ రామ్‌కు 16వ సినిమా. ఈ చిత్రానికి ‘118’ అనే ఆసక్తికర టైటిల్‌ను పెట్టారు. ఈ మేరకు టైటిల్‌ను సోమవారం ప్రకటించారు. ఇదొక సస్పెన్ష్‌తో కూడిన యాక్షన్ థ్రిల్లర్ అని నిర్మాణ సంస్థ ఈస్ట్ కోస్ట్ ప్రొడక్షన్స్ ట్వీట్ చేసింది. ఈ చిత్రంలో కళ్యాణ్ రామ్ సరసన నివేద థామస్, షాలిని పాండే హీరోయిన్లుగా నటిస్తున్నారు. శేఖర్ చంద్ర సంగీతం అందిస్తోన్న ఈ సినిమా వచ్చే ఏడాది జనవరిలో ప్రేక్షకుల ముందుకు రానుంది.