నాని.. వరసగా తొమ్మిదో హిట్? ఇది రికార్డే!

నాని విజయపరంపర మొదలై చాలా కాలం అయ్యింది. 2015లో వచ్చిన ‘ఎవడే సుబ్రమణ్యం’ సినిమాతో ఈ హీరో ప్రభంజనం మొదలైంది. ఆ తర్వాత వచ్చిన ‘భలే భలే మగాడివోయ్’ సంచలన విజయం సాధించింది. ఆ వెంటనే వచ్చిన కృష్ణగాడి వీర ప్రేమగాథతో నాని హ్యాట్రిక్ విజయాలు పూర్తి అయ్యాయి. ఆ తర్వాత కూడా ధాటి ఎక్కడా తగ్గలేదు.

జెంటిల్‌మన్, మజ్నూ, నేను లోకల్ సినిమాలతో మరో విజయాల హ్యాట్రిక్ ను పూర్తి చేసుకున్నాడు ఈ హీరో. ఆ పై ‘నిన్నుకోరి’, ‘ఎమ్‌సీఏ’ల రూపంలో మరో రెండు హిట్లు లభించాయి.

ఈ విధంగా ఎనిమిది వరస విజయాలతో ఊపుమీదున్నాడు ఈ హీరో. రేపు తొమ్మిదో సినిమా రాబోతోంది. అదే ‘కృష్ణార్జున యుద్ధం’. పౌరాణికం టైటిల్ తో వస్తున్నా, ఇది సోషల్ సినిమానే. కమర్షియల్ ఎంటర్ టైనరే. ఈ సినిమా హిట్ అయితే.. నాని వరసగా తొమ్మిదో విజయాన్ని అందుకున్నట్టు అవుతుంది. తద్వారా ట్రిపుల్ హ్యాట్రిక్ విజయాలను సొంతం చేసుకున్న హీరో అవుతాడు.

ఇక దర్శకుడు మేర్లపాక గాంధీ కూడా మంచి ఫామ్ లోనే ఉన్నాడు. ‘వెంకటాద్రి ఎక్స్ ప్రెస్’, ‘ఎక్స్ ప్రెస్ రాజా’లతో తనేంటో నిరూపించుకున్న ఈ దర్శకుడు ఇప్పుడు నానితో ఎలాంటి హిట్ కొడతాడో చూడాల్సి ఉంది. ఈ సినిమా విజయం పట్ల నాని ఫుల్ కాన్ఫిడెన్స్‌తోనే ఉన్నాడు.