‘ఆటగాళ్ళు’ విడుదలకు రెడీ.. డేట్ ఫిక్స్!

వైవిధ్యమైన సినిమాలు చేసే నారా రోహిత్, సీనియర్ నటుడు జగపతిబాబు ప్రధాన పాత్రల్లో నటించిన చిత్రం ‘ఆటగాళ్ళు’. ‘గేమ్ ఆఫ్ లైఫ్’ అనేది ట్యాగ్‌లైన్. ఫ్రెండ్స్ మూవీ క్రియేషన్స్ పతాకంపై వాసిరెడ్డి రవీంద్రనాథ్, వాసిరెడ్డి శివాజీ ప్రసాద్, మక్కెన రాము, వడ్లపూడి జితేంద్ర సంయుక్తంగా నిర్మిస్తున్నారు. ‘ఆంధ్రుడు’ సినిమాతో మంచి గుర్తింపు తెచ్చుకున్న దర్శకుడు పరుచూరి మురళి ఈ చిత్రానికి దర్శకత్వం వహించారు. హాస్య బ్రహ్మ బ్రహ్మానందం ముఖ్య పాత్రలో నటించారు. ఈ సినిమా ద్వారా దర్శనా బానిక్ హీరోయిన్‌గా పరిచయమవుతోంది.

ఇప్పటికే షూటింగ్ పూర్తిచేసుకున్న ‘ఆటగాళ్ళు’ ప్రస్తుతం నిర్మాణాంతర కార్యక్రమాలు జరుపుకుంటోంది. ఇంటరెస్టింగ్ డ్రామాగా తెరకెక్కుతోన్న ఈ సినిమాను జూలై 5న విడుదల చేయాలని దర్శక, నిర్మాతలు నిర్ణయించారు. ఇటీవల విడుదల చేసిన ఈ సినిమా ఫస్ట్ లుక్‌ పోస్టర్‌కు మంచి స్పందన వచ్చింది. నారా రోహిత్, జగపతిబాబు పాత్రలు ఈ సినిమాకు ప్రధాన బలమని, ఆ పాత్రలకు వారిద్దరూ పూర్తి న్యాయం చేశారని చిత్ర యూనిట్ చెబుతోంది. కాగా, ఈ సినిమాకు సాయి కార్తీక్ సంగీతం సమకూర్చారు. విజయ్ సి కుమార్ సినిమాటోగ్రఫీ అందించారు.