Dasara Trailer: మొలదారం కింద గుడాలు రాల్తాయ్ బాంచత్.. ఇది నాని దస‘రా’!

నేచురల్ స్టార్ నాని (Nani) పేరు చెప్పగానే అందమైన కటౌట్, మనసును చక్కిలిగింతలు పెట్టే చిరునవ్వు, సహజమైన నటన గుర్తుకొస్తాయి. ఫ్యామిలీ ఆడియన్స్‌కు బాగా దగ్గరైన నాని.. అడపాదడపా మాస్ ఆడియన్స్‌ను మెప్పించే కమర్షియల్ సినిమాలు కూడా చేశారు. కానీ, గతంలో ఎప్పుడూ చూడనంత మొరటుగా, డీ-గ్లామర్ రోల్‌లో ఆయన నటించిన చిత్రం ‘దసరా’ (Dasara). ఇప్పటికే విడుదలైన ప్రచార చిత్రాలు, టీజర్.. సినిమాలో నాని పాత్ర ఎలా ఉండబోతోందో చెప్పాయి. ఈరోజు విడుదలైన ట్రైలర్ (Dasara Trailer) అసలు ధరణి (సినిమాలో నాని పోషించిన పాత్ర పేరు) విశ్వరూపం ఎలా ఉండబోతోందో చూపించింది.తెలంగాణలోని గోదావరిఖని గనుల ప్రాంతంలో జరిగిన కథగా దర్శకుడు శ్రీకాంత్ ఓదెల వెండితెరపై ‘దసరా’ను చూపించబోతున్నారు. బొగ్గు గనుల్లో పనిచేసే మనుషులు ఎలా ఉంటారో ‘దసరా’ సినిమాలోని పాత్రలు కూడా అలానే ఉండబోతున్నాయి. తెలంగాణ గ్రామీణ సంప్రదాయాలు, అలవాట్లను ఈ సినిమాలో చూపించబోతున్నారు. అలాగే అక్కడి గొడవలు, రాజకీయాల చుట్టూ ‘దసరా’ కథ తిరుగుతుందని ట్రైలర్ చూస్తే అర్థమవుతోంది. పక్కా రూట్ లెవెల్‌కు తీసుకెళ్లే సినిమా ‘దసరా’. ముఖ్యంగా హీరో నాని పాత్ర చిత్రీకరణ సినిమాకు ప్రత్యేక ఆకర్షణ. తెలంగాణ యాసలో ఆయన చెప్పే డైలాగులు చాలా కొత్తగా అనిపిస్తున్నాయి. ఆడియన్స్‌ను కచ్చితంగా ఈ డైలాగులు, నాని యాక్షన్ కట్టిపడేయడం ఖాయం.

‘ఒక్కొక్కడికి మొలదారం కింద గుడాలు రాల్తాయ్ బాంచత్’ అంటూ నాని చెప్పే డైలాగు సినిమాలో ఆయన పాత్ర ఎంత మొరటుగా ఉంటుందో స్పష్టం చేస్తోంది. ‘పది తలకాయలున్నోడే ఒక్క తలకాయ్ ఉన్నోని చేతిలో కుక్కచావు చచ్చిండు. పురాణాలను మించిన బతుకులా మనయి’ అంటూ సముద్రఖని చెప్పే డైలాగు ఈ సినిమాలో పాత్రల తీరు ఎలా ఉంటుందో చెప్తోంది. కీర్తి సురేష్ పోషించిన వెన్నెల పాత్రతో మొదలైన ‘దసరా’ ట్రైలర్.. ‘ఎట్లయితే గట్లాయే.. చూసుకుందాం’ అంటూ ‘నీయవ్వ’ అని నాని శత్రువులపై విరుచుకుపడే ఫైట్‌తో ముగిసింది. ఆఖరిలో కీర్తి సురేష్, నాని ఎమోషనల్ సీన్‌తో డైరెక్టర్ ఫినిషింగ్ టచ్ ఇచ్చారు.

శ్రీ లక్ష్మీ వెంకటేశ్వర సినిమాస్ బ్యానర్‌పై సుధాకర్ చెరుకూరి భారీ ఎత్తున నిర్మించిన ఈ పాన్ ఇండియా మూవీలో దీక్షిత్ శెట్టి, సముద్రఖని, సాయి కుమార్, జరీనా వహాబ్ ముఖ్య పాత్రల్లో నటించారు. సత్యన్ సూర్యన్ సినిమాటోగ్రఫీ అందించిన ఈ సినిమాకు సంతోష్ నారాయణన్ సంగీతం సమకూర్చారు. నవీన్ నూలి ఎడిటర్. మార్చి 30న తెలుగుతో పాటు హిందీ, తమిళం, మలయాళం, కన్నడ భాషల్లో ‘దసరా’ విడుదలకానుంది.