దూకుడు పెంచిన ‘నానీ’!

వరస విజయాలను అందుకుంటూ.. నిర్మాతల హీరోగా మారిపోయాడు ‘నేచురల్ స్టార్’.. నానీ. అతడితో సినిమా చేస్తే.. మినిమమ్ ఎమౌంట్ గ్యారంటీ అనే స్టాంప్ పడిపోయింది ఇండస్ట్రీలో. క్రేజ్ ఉన్నప్పుడే క్యాష్ చేసుకోవాలనుకుంటున్నాడో.. ఏమో గానీ.. నానీ కూడా వరస సినిమాలను లైన్‌లో పెడుతూ.. దూకుడు పెంచాడు. ఇటీవలే 'నేను లోకల్' సినిమాతో సక్సెస్ అందుకున్న నాని ప్రస్తుతం 'నిన్ను కోరి' సినిమా షూటింగ్‌లో బిజీగా ఉన్నాడు. ప్రస్తుతం యూఎస్‌లో షూటింగ్ జరుపుకొంటున్న ఈ చిత్రంలో నాని పక్కన హీరోయిన్‌గా నివేదా థామస్ నటి'స్తోంది. ఈ సినిమా తర్వాత దిల్ రాజు బ్యానర్ లో వేణు శ్రీరామ్ దర్శకత్వంలో 'ఎంసీఏ' సినిమా చేయబోతున్నాడు. త్వరలోనే ఈ సినిమా సెట్స్ పైకి వెళ్లనుంది.

'కృష్ణగాడి వీరప్రేమ గాథ' లాంటి సక్సెస్‌ఫుల్ సినిమా ఇచ్చిన హను రాఘవపూడితో మరో సినిమాను కూడా ఓకే చేశాడు. అలానే మేర్లపాక గాంధీ కథకు కూడా గ్రీన్ సిగ్నల్ ఇచ్చినట్లు తెలుస్తోంది. అంటే.. మరో రెండేళ్ల వరకు కాల్షీట్లు సర్దేశాడన్నమాట! భావోద్వేగాలు, సంభాషణలు పలికే విధానం, శరీర భాషతో తనకంటూ ప్రత్యేక ఇమేజ్‌ సొంతం చేసుకున్న ఈ ‘భలే భలే మగాడి’ అభిమానులకు ఇక పండగే మరి.

ఒకదాని వెంట మరోటి సినిమాలకు ఓకే చెప్పేస్తున్నా.. కథల విషయంలో నిర్లక్ష్యమేమీ ప్రదర్శించడం లేదు. మంచి అంశాలున్న కథలనే ఎంచుకుంటున్నాడు. చేతి నిండా సినిమాలు ఉన్నప్పటికీ.. నిర్మాతలను కాల్షీట్ల విషయంలో ఎలాంటి ఇబ్బందులు పెట్టకుండా.. అంచనా వేసుకున్న బడ్జెట్‌ మించకుండా అన్ని విధాలా సహకరిస్తూ.. నిర్మాతల హీరోగా మారిపోయాడు. చిన్న డైరెక్టర్లైనా, కొత్త వారైనా సినిమాలు చేసేందుకు ఓకే చెబుతున్నాడు. ఇలా మంచితనంతోనూ మార్కులు కొట్టేస్తున్నాడన్నమాట!