నయనతార.. పెళ్లి కబురు భలే చెప్పింది!

దక్షిణాది టాప్ హీరోయిన్ నయనతార గత కొద్ది కాలంగా తమిళ దర్శకుడు విఘ్నేశ్ శివన్‌తో ప్రేమలో ఉన్నారనే వార్తలు హల్ చల్ చేస్తున్నాయి. ఆ మధ్య వీరద్దరూ పెళ్లి చేసుకున్నారనే కథనాలు కూడా ప్రసారమయ్యాయి. కానీ నయన్ వాటిని ఖండించారు. మేం మంచి స్నేహితులమని చెప్పుకొచ్చారు. కానీ వారిద్దరూ జంటగా కనిపిస్తుండటంతో.. ఇద్దరి మధ్య ప్రేమాయణం సాగుతోందని చాలా మంది భావించారు. నయనతార మాత్రం ఓపెన్ కాలేదు.

శుక్రవారం చెన్నైలో ది హిందూ దినపత్రిక ఓ అవార్డుల ఫంక్షన్‌ను ఏర్పాటు చేసింది. సినీ ఇండస్ట్రీకి నయనతార చేసిన సేవలకు గానూ ఆమెకు ఓవరాల్ ఎక్సలెన్స్ అవార్డును అందజేశారు. ఈ సందర్భంగా నయన్ మాట్లాడుతూ.. తన తల్లిదండ్రులు, సోదరుడు, కాబోయే భర్తకు ధన్యవాదాలు తెలిపారు.

నయనతార తన మాటల్లో ఎక్కడా విఘ్నేశ్ పేరు ప్రస్తావించలేదు. కానీ నయన్ చెప్పింది ఈ యువ డైరెక్టర్ గురించేనని, వారిద్దరూ త్వరలో పెళ్లాడబోతున్నారని ప్రచారం మొదలైంది. సోషల్ మీడియాలో వారిద్దరూ విదేశాల్లో సరదాగా గడిపిన ఫొటోలు దర్శనం ఇస్తున్నాయి. నయన్ మాత్రం తన పెళ్లి వార్తను పరోక్షంగా భలే చెప్పింది కదూ.