నీది నాదీ ఒకే కథ: వీడు ‘కోతి’కి కజిన్‌‌లా ఉన్నాడే!

‘‘నీలాంటి వేస్ట్‌ఫెలోస్‌ను మార్చడంలో నాకో తృప్తి ఉంటుంది’’. ‘‘మనిషి.. కోతి నుంచి క్రమేనా ఇలా మారుతూ వచ్చాడు. కానీ నువ్వు మాత్రం కోతి దగ్గరే ఆగిపోయావు’’ అంటూ పాపం హీరో శ్రీవిష్ణును అంతా ఓ ఆట ఆడేసుకుంటున్నారు. ‘పండిత పుత్ర.. పరమ శుంఠ’ తరహాలో చదువు, సంస్కారం అబ్బాని ఓ ఉపాధ్యాయుడి కొడుకు కథతో తెరకెక్కిన ‘నీది నాది ఒకే కథ’ ట్రైలర్ ఇప్పుడు యూట్యూబ్‌లో సందడి చేస్తోంది. ‘బిచ్చగాడు’ ఫేం సత్నా టిటస్ ఈ సినిమాలో శ్రీవిష్ణుకు జంటగా నటిస్తోంది.

వేణు ఊడుగుల దర్శకత్వం వహిస్తున్నారు. చదివంటే ఆమడ దూరం పారిపోయే యువకుడు.. తన జీవితంలో ఎదుర్కొనే కష్టాలను కామెడీతో ముడిపెట్టి ఎమోషనల్‌గా తెరకెక్కించినట్లు ఈ ట్రైలర్ చూస్తుంటే తెలుస్తుంది. ముఖ్యంగా శ్రీవిష్ణు, సత్నా మధ్య వచ్చే సన్నివేశాలు కొత్తగా ఉన్నాయి.

ఓ సన్నివేశంలో శ్రీవిష్ణు ‘‘నాకు మీలా అవ్వాలని ఉంది ధార్మిక గారు’ అని సత్నాను అడుగుతాడు. ‘‘చూడు సాగర్‌.. నేనేదో గ్రేట్‌ కాదు కానీ, నీలాంటి వేస్ట్‌ ఫెలోస్‌ను మార్చడంలో నాకో తృప్తి ఉంటుంది’’ అనే డైలాగ్‌కు మీరు నవ్వకుండా ఉండలేరు.

హీరో నారో రోహిత్ సమర్పణలో ఆరాన్‌ మీడియా వర్క్స్‌ పతాకంపై ప్రశాంతి, కృష్ణ విజయ్‌ ఈ సినిమాను నిర్మిస్తున్నారు. ఈ చిత్రం మార్చి 23న ప్రేక్షకుల ముందుకు రానుంది.