వక్కంతం వంశీకి బండ్ల గణేష్ రివర్స్ షాక్!

టెంపర్ సినిమాకు కథ అందించినందుకు తనకి ఇస్తానన్న పారితోషికం ఇవ్వలేదని ఆ సినిమా నిర్మాత బండ్ల గణేష్‌పై కేసు పెట్టిన ప్రముఖ రచయిత వక్కంతం వంశీ ఆ కేసులో విజయం సాధించిన సంగతి తెలిసిందే. ఈ కేసులో ఇరువురి వాదనలు విన్న కోర్టు.. వక్కంతం వంశీకి పారితోషికం ఎగ్గొట్టినందుకుగాను బండ్ల గణేష్‌కి ఆరు నెలల జైలు శిక్షతోపాటు భారీ మొత్తంలో జరిమానా కూడా విధించింది. దీంతో ఈ లీగల్ ఫైట్‌లో బండ్ల గణేష్‌పై వక్కంతం వంశీ పైచేయి సాధించినట్టయింది.

ఇదిలావుంటే, వక్కంతం వంశీతో ఈ న్యాయ పోరాటంలో ఓడిపోయిన బండ్ల గణేష్ మరో రివేంజ్ డ్రామాకు ప్లాన్ చేస్తున్నాడంటున్నాయి టాలీవుడ్ సినీవర్గాలు. తనపై గెలిచిన ఆనందం వక్కంతం వంశీకి దక్కకుండా అతడిపై ఈసారి తానే కోర్టుకి వెళ్లేందుకు ప్లాన్ చేస్తున్నాడట బండ్ల గణేష్. అందుకు వక్కంతం వంశీ రాసిన 'టెంపర్' ఇంగ్లీష్ నవల కాపీ రైట్స్‌ని వాడుకోవాలనుకుంటున్నాడట బండ్ల గణేష్.

ఆ సినిమాకు నిర్మాతను అయిన తన అనుమతి తీసుకోకుండానే ఇంగ్లీష్ నవల పబ్లిష్ చేయించి తనని మోసం చేశాడనేది ఇప్పుడు వంశీపై బండ్ల గణేష్ చేయబోయే ప్రధానమైన ఆరోపణ అని చెబుతున్నాయి సినీవర్గాలు. ఈ రివర్స్ ఫైట్ ఇంకెన్ని మలుపులకి దారితీస్తుందో వేచిచూడాల్సిందే మరి!