‘కేశవ’ అక్కడ రిలీజ్ అవుతుందా..?

నిఖిల్ నటించిన 'కేశవ' సినిమా మరో నాలుగు రోజుల్లో ప్రేక్షకుల ముందుకు రానుంది. సోమవారం సినిమా సెన్సార్ పూర్తి చేయడానికి ప్రయత్నిస్తున్నారు. సినిమా రీరికార్డింగ్‌లో ఏదో సమస్య ఉండడంతో దర్శకుడు సుధీర్ వర్మ చెన్నైకి వెళ్లినట్లు తెలుస్తోంది. సెన్సార్‌కు రఫ్ కాపీ చూపించేసి సర్టిఫికేట్ తెచ్చుకున్నా.. ‘క్యూబ్‌’లోకి అప్‌లోడ్ చేయడం, అమెరికాకు ‘కీ’లని పంపడం వంటి కార్యక్రమాలు మిగిలి ఉన్నాయి. ఓవర్సీస్‌లో నిఖిల్‌కు మంచి మార్కెట్ ఉంది. నిఖిల్ నటించిన 'ఎక్కడకి పోతావు చిన్నవాడా' సినిమా అక్కడ మంచి కలెక్షన్స్‌ను రాబట్టింది.

ఈ నమ్మకంతోనే ‘కేశవ’ సినిమాను కూడా భారీగా విడుదల చేయడానికి ఏర్పాట్లు చేసుకుంటున్నారు. దాదాపు 120 స్క్రీన్లలో సినిమా విడుదలయ్యేలా సెట్ చేసుకున్నారు. కానీ ఇప్పుడు పరిస్థితి అనుకూలంగా లేదు. సినిమా దర్శకత్వంతో పాటు నిర్మాణ బాధ్యతలు కూడా సుధీర్ వర్మ దగ్గరుండి చూసుకున్నారు. సినిమా ఫస్ట్ కాపీ తీసి ఇవ్వాల్సిన బాధ్యత ఆయన మీదే ఉంది. కానీ ఇప్పుడు వచ్చిన టెక్నికల్ సమస్యల దృష్ట్యా ఓవర్సీస్‌లో సినిమా విడుదలవుతుందా..? అనే అనుమానులు వ్యక్తమవుతున్నాయి. మరి ఫైనల్‌గా ఏం జరుగుతుందో.. చూడాలి!