ప్రేమికులకు నితిన్ గిఫ్ట్.. ‘చల్ మోహన్ రంగ’ టీజర్

ప్రేమికుల దినోత్సవం సందర్భంగా నితిన్ రేపు (ఫిబ్రవరి 14న) ‘చల్ మోహన రంగ’ టీజర్‌తో సర్‌ప్రైజ్ ఇవ్వనున్నాడు. 'నితిన్, మేఘా ఆకాష్' జంటగా శ్రేష్ట్ మూవీస్, పవన్ కళ్యాణ్ క్రియేటివ్ వర్క్స్ సంయుక్తంగా నిర్మిస్తున్న చిత్రానికి 'చల్ మోహన రంగ' అనే టైటిల్ ఖరారు చేశారు. తాజాగా ఈ మూవీ ఫస్ట్‌లుక్‌ను పవర్ స్టార్ పవన్ కళ్యాణ్ తన ట్విట్టర్ ద్వారా ఆదివారం ఉదయం విడుదల చేసి చిత్ర యూనిట్ కు అభినందనలు తెలిపిన విషయం తెలిసిందే.

కాగా వాలంటైన్స్ డే సంద‌ర్భంగా రేపు ఉద‌యం 9గం.లకి ఈ మూవీ టీజ‌ర్‌ను విడుద‌ల చేయ‌బోతున్న‌ట్టు ప్ర‌క‌టించింది చిత్ర యూనిట్. మాటల మాంత్రికుడు త్రివిక్రమ్ ఈ చిత్రానికి కథను అందిస్తుండగా, శ్రీమతి నిఖితారెడ్డి సమర్పణ‌లో ప్రముఖ నిర్మాత ఎన్. సుధాకర్ రెడ్డి ఈ చిత్రాన్ని నిర్మిస్తున్నారు. కృష్ణ చైతన్య దర్శకత్వం వహిస్తున్నారు. నితిన్ కెరీర్లో ఇది 25వ చిత్రం కావడం విశేషం.

ప్రస్తుతం షూటింగ్ అనంతర కార్యక్రమాలతో బిజీగా ఉన్న చిత్ర యూనిట్ ‘చల్ మోహన రంగ’ సినిమాను ఏప్రిల్ 5న విడుదల చేయనున్నట్లు నిర్మాత సుధాకర్ రెడ్డి తెలిపారు. హైదరాబాద్, ఊటీ, అమెరికాలలో షూటింగ్ జరుపున్న ఈ చిత్రానికి ఒక సాంగ్ మినహా దాదాపు షూటింగ్ పూర్తైంది. ఈ మిగిలిన ఒక్క గీతాన్ని ఈ నెల 14 నుంచి హైదరాబాద్‌లో చిత్రీకరించనున్నామని నిర్మాతలు తెలిపారు. తమన్ ఈ చిత్రానికి స్వరాలను సమకూర్చుతున్నారు.