‘లై’ యాభై కోట్లు కొట్టకపోతే చల్తా ‘నై’

అప్పటివరకు పాతిక కోట్ల మార్కెట్ ఉన్న నితిన్‌ను 'అ ఆ' సినిమాతో ఒక్కసారిగా 50 కోట్ల క్లబ్‌లో చేర్చాడు త్రివిక్రమ్. ఆ సినిమాతో వచ్చిన క్రేజ్‌ను కొనసాగించడానికి తదుపరి సినిమా విషయంలో నితిన్ చాలా జాగ్రత్తలు తీసుకున్నాడు. చాలా కథలు విన్న అతడు ఫైనల్‌గా హను రాఘవపూడి కథను ఓకే చేశాడు. ఈ సినిమాకు 'లై' అనే టైటిల్‌ను ఖరారు చేశారు.

ఇప్పటికే ఈ సినిమా షూటింగ్ చివరి దశకు చేరుకుంది. ఆగస్ట్ 11న విడుదల చేయబోతున్నమంటూ చిత్రబృందం నుండి ఓ ప్రకటన కూడా వచ్చింది. ఈ సినిమాకు దాదాపుగా 40 కోట్ల వరకు ఖర్చు పెట్టారని సమాచారం. అయితే హను రాఘవపూడికి త్రివిక్రమ్ మాదిరి స్టార్ డమ్ లేదు. నితిన్ తనకున్న క్రేజ్‌ను బట్టి పాతిక కోట్ల వరకు రాబట్టగలడు.

సో.. ఇప్పుడు త్రివిక్రమ్ లేకుండా 50 కోట్ల కలెక్షన్స్ రాబట్టడం మామూలు విషయం కాదు. నిర్మాతలు పెట్టిన పెట్టుబడికి కనీసం సినిమా థియేటర్స్‌లో యాభై కోట్ల షేర్ ను వసూలు చేయాలి. అప్పుడు గానీ నిర్మాతలకు లాభాలు గిట్టవు. కమర్షియల్ గా దర్శకుడు హను రాఘవపూడికి పెద్ద సక్సెస్‌లు కూడా లేని నేపధ్యంలో నిర్మాతలు ఏ సాహసంతో ఇంత భారీ బడ్జెట్‌ను పెట్టుబడిగా పెట్టి సినిమా చేశారో అంతుచిక్కని ప్రశ్న. అంతగా 'లై' లో ఏముందో అనే ఆసక్తి అందరిలో కలుగుతుంది.