నితిన్, శర్వా.. కాంబో సినిమా పేరు అదే!

నితిన్, శర్వానంద్ కాంబోలో ఒక సినిమాను రూపొందించడం గురించి అధికారిక ప్రకటన చేశాడు ప్రముఖ నిర్మాత దిల్ రాజు. పుట్టిన రోజు సందర్భంగా ఇచ్చిన ఇంటర్వ్యూలో రాజు తన తదుపరి సినిమాల గురించి వివరించారు. ఇందులో శర్వానంద్, నితిన్ కాంబోలో ఒక మల్టీస్టారర్ సినిమాను రూపొందించనున్నట్టుగా ఆయన ప్రకటించారు. ఈ సినిమాకు హరీష్ శంకర్ దర్శకత్వం వహిస్తారని కూడా తెలపడం విశేషం.

అంతేకాదు ఈ సినిమాకు సంబంధించి టైటిల్ నుకూడా అనౌన్స్ చేశారు. ఇంతకీ ఈ యంగ్ హీరోలిద్దరూ కలిసి నటిస్తున్న సినిమా పేరేంటంటే.. ‘దాగుడుమూతలు’ ఈ టైటిల్ ను దిల్ రాజు ప్రకటించారు. తమ తమ కెరీర్ లలో బెస్ట్ స్టేజీలో ఉన్న ఇద్దరు యంగ్ హీరోలు కలిసి నటిస్తున్న నేపథ్యంలో ఈ సినిమాపై మంచి క్రేజ్ ఉంటుందని వేరే చెప్పనక్కర్లేదు.

అలాగే కొత్త దర్శకుడు శశి డైరెక్షన్లో ‘అదే నువ్వు అదే నేను’ పేరుతో ఒక సినిమా చేయబోతున్నట్టుగా రాజు ప్రకటించారు. భారతీయుడు-2 ప్రాజెక్టు నుంచి తప్పుకున్నట్టుగా పేర్కొన్నారు. నితిన్ హీరోగా ‘శ్రీనివాస కల్యాణం’ అనే సినిమా ప్రతిపాదనలో ఉందని, అందులో నటించడానికి సాయి పల్లవి నో చెప్పిందన్న వార్తలను ఆయన ఖండించారు.