ఏఎన్నార్ బయోపిక్ ఇక లేనట్టే?

ఒకవైపు మహానటి సావిత్రి బయోపిక్ వచ్చి విజయవంతం అయ్యింది. మరోవైపు ఎన్టీఆర్ బయోపిక్ తెరకెక్కుతోంది. ఇక ఇతర ప్రముఖుల బయోపిక్‌లు కూడా ప్రతిపాదన దశలో కొన్ని, షూటింగ్ దశలో మరి కొన్ని ఉన్నాయి. ఈ నేపథ్యంలో మరింత మంది ప్రముఖుల బయోపిక్స్‌ కూడా ప్రతిపాదనలోకి వస్తూ ఉన్నాయి. అలాంటి ప్రతిపాదనల్లో ఒకటి అక్కినేని నాగేశ్వరరావు బయోపిక్. ఎన్టీఆర్ బయోపిక్ నేపథ్యంలో ఏఎన్నార్ బయోపిక్ కూడా రాబోతున్నట్టుగా మొన్నామధ్య వార్తలు వచ్చాయి. ఈ విషయంలో అక్కినేని నాగార్జున పని మొదలుపెట్టినట్టుగా రూమర్లు వినిపించాయి.

అయితే వాటన్నింటికీ తెరదించాడు నాగ్. తన తాజా సినిమా ‘ఆఫీసర్’ ప్రమోషన్లో ఉన్న నాగార్జున ఏఎన్నార్ బయోపిక్ గురించి మాట్లాడారు. తన తండ్రి బయోపిక్ ప్రతిపాదన ఏమీ లేదన్నట్టుగా మాట్లాడాడు ఆయన.

‘మా నాన్న జీవితం అందంగా, ఆదర్శవంతంగా సాగింది. అలాంటి కథను జనాలకు చూపిస్తే నచ్చుతుందా? వాళ్లకు కొంచెమైన నెగిటివ్ టచ్ ఉండాలి కదా? ఆయన కెరీర్‌లో డౌన్ ఫాల్ లేదు. బతికినంతకాలం ఆనందంగా బతికారు. ఐదుగురు పిల్లలకు గుడ్ బై చెబుతూ వెళ్లిపోయారు. ఆయన కథ సినిమాగా కన్నా పుస్తకంగా వస్తే బాగుంటుంది..’ అని అన్నాడు ఏఎన్నార్ తనయుడు. దీన్ని బట్టి ఏఎన్నార్ బయోపిక్‌ను తీసే ఉద్దేశం అక్కినేని ఫ్యామిలీకి లేదని స్పష్టం అవుతోంది.