పెళ్లి చేసుకోనందుకు బాధలేదు: హీరోయిన్

తను ఇప్పటి వరకూ పెళ్లి చేసుకోనందుకు బాధపడటం లేదు అని అంటోంది నటి టబు. 46 యేళ్ల ఈ హైదరాబాదీ భామ ఇప్పటి వరకూ అవివాహితే అని తెలిసిన సంగతే. ఈ నేపథ్యంలో ఈమె పెళ్లి అప్పుడప్పుడు వార్తల్లోని అంశం అవుతూ ఉంటుంది. టబు పెళ్లెప్పుడు? పెళ్లి చేసుకోదా? సింగిల్ గానే ఉండిపోతుందా? అనే ప్రశ్నలపై చర్చ జరుగుతూ ఉంటుంది. ఈ నేపథ్యంలో తన పెళ్లి అంశం గురించి టబు తాజాగా స్పందించింది.

ఈమె సూటిగా చెప్పిన మాట ఏమిటంటే.. ఇప్పటి వరకూ పెళ్లి చేసుకోనందుకు తనకెలాంటి బాధ లేదు అని. పెళ్లి చేసుకోకపోవడంపై బాధ కానీ, ఆనందం కానీ తనకు ఏమీ లేదని టబు చెప్పింది. అసలు పెళ్లి చేసుకుంటే ఎలా ఉంటుందో తను ఆలోచించనే లేదు కాబట్టి.. పెళ్లితో సంబంధమున్న ఫీలింగ్సేవీ తనకు కలగడం లేదని టబు తేల్చి చెబుతోంది.

సింగిల్‌గా ఉన్నందుకు ఆనందించిన క్షణాలు ఏవైనా ఉన్నాయా? అంటే.. ప్రతిక్షణమూ తను ఆనందంగానే ఉంటానని అంటోంది టబు. ఇకపై పెళ్లి చేసుకునే ఉద్దేశం ఉందా? అంటే మాత్రం.. దానికి తన వద్ద సమాధానం లేదని అంటోంది. ఈ విధంగా తన పెళ్లి గురించి టబు స్పందించింది. పెళ్లి చేసుకునే ప్రయత్నాలు ఏవీ లేవన్నట్టుగా మాట్లాడింది.