Nota Trailer: పవర్‌ఫుల్ పొలిటికల్ సెటైర్!

వరస సంచలన విజయాల హీరో విజయ్ దేవరకొండ ‘నోటా’ ట్రైలర్‌తో వచ్చాడు. త్వరలోనే విడుదల కాబోతున్న ఈ సినిమాకు సంబంధించిన ఈ ట్రైలర్ ఆసక్తిని, అంచనాలను పెంచే స్థాయిలో ఉంది. టైటిల్‌తోనే ఈ సినిమా పొలిటికల్ బ్యాక్‌డ్రాప్‌తో రూపొందుతోందని స్పష్టం అవుతోంది. ఈవీఎంల మీద ఉండే ‘నోటా’ మీటనే ఈ సినిమా టైటిల్‌గా ఉపయోగించుకున్నారు.

అందుకు తగ్గట్టుగా రాజకీయ నేతలు, వారి తీరుపై సెటైరిక్‌గా ఈ సినిమా రూపొందిందని ట్రైలర్‌తో పూర్తి స్పష్టత వస్తోంది. వ్యవస్థపూర్వకమైన అవినీతి... రాజకీయ నేతల వైఖరి మీద ట్రైలర్లోనే సెటైర్లు పడ్డాయి. ‘ఒక స్టేట్ ఫ్యూచర్ అంతా ఒక స్వామీజీ చేతుల్లోనా..’ అంటూ విజయ్ దేవరకొండ డైలాగ్ చెప్పడం రాజకీయ నేతలు స్వామీజీల సలహాల మేరకు నిర్ణయాలు తీసుకోవడంపై సెటైరిక్‌గా ఉంది. అలాగే తమిళనాట వరసగా సీఎం సీట్లో వ్యక్తులు మారిన వైనాన్ని కూడా ట్రైలర్లో ప్రస్తావించారు.

రాష్ట్రంలో అల్లర్లు జరగడమే కేంద్ర ప్రభుత్వానికి కావాల్సింది అన్న ట్టుగా ఉన్న డైలాగ్ కూడా నేటి రాజకీయానికి వర్తించేలా ఉంది. ఈ సినిమాను తెలుగుతో పాటు తమిళంలో కూడా ఒకేసారి రూపొందించి విడుదల చేస్తున్నారు. దీంతో తమిళనాడు రాజకీయ పరిణామాలు గుర్తుకు తెచ్చేలా ఉంది ట్రైలర్. సీనియర్ నటుడు సత్యరాజ్ ఈ సినిమాలో విజయ్‌కి పొలిటికల్ గైడ్‌గా నటించినట్టుగా ఉన్నాడు. ఆనంద్ శంకర్ దర్శకత్వంలో ఈ సినిమా రూపొందుతోంది.