‘NRI - నాయనా..! రారా ఇంటికి’: అవసరాలను పిలుస్తోన్న మంచు లక్ష్మి

రచయితగా, అసిస్టెంట్ డైరెక్టర్‌గా తెలుగు చిత్రసీమలోకి అడుగుపెట్టిన అవసరాల శ్రీనివాస్.. ‘అష్టాచమ్మా’ సినిమాతో నటుడిగా పరిచయమయ్యారు. ఆ చిత్రంలో శ్రీనివాస్‌కు మంచి గుర్తింపు రావడంతో వసరపెట్టి సినిమాలు చేశారు. ‘ఊహలు గుసగుసలాడే’ చిత్రంతో దర్శకుడి అవతారమెత్తి విమర్శకుల ప్రశంసలు అందుకున్నారు. ఓ వైపు నటుడిగా సినిమాలు చేస్తూనే దర్శకత్వమూ వహిస్తున్నారు. కిందటేడాది ‘ఆ!’, ‘మహానటి’, ‘దేవదాస్’, ‘సమ్మోహనం’, ‘అంతరిక్షం’ చిత్రాల్లో అవసరాల నటించారు. కేవలం క్యారెక్టర్ ఆర్టిస్ట్‌గా మాత్రమే కాకుండా హీరోగానూ అవసరాల తన అదృష్టాన్ని పరీక్షించుకున్నారు.

అవసరాల శ్రీనివాస్ ప్రధాన పాత్రలో 2017లో ‘బాబు బాగా బిజీ’ అనే అడల్ట్ కామెడీ సినిమా వచ్చింది. టీజర్, ట్రైలర్లతో ఈ సినిమా కాకరేపినా బాక్సాఫీసు వద్ద మాత్రం బోల్తా కొట్టింది. ఆ తరవాత మళ్లీ అవసరాల హీరో ప్రయత్నం చేయలేదు. మళ్లీ చాలా గ్యాప్ తీసుకుని ఇప్పుడు హీరోగా వస్తున్నారు. ఈ చిత్రానికి ‘NRI - నాయనా..! రారా ఇంటికి’ అనే టైటిల్‌ను ఖరారు చేశారు. ఈ చిత్రంలో మంచు లక్ష్మి మరో ప్రధాన పాత్రలో నటించనున్నారు.

ఈ సినిమా ద్వారా బాల రాజశేఖరుని దర్శకుడిగా పరిచయం అవుతున్నారు. ప్రదీప్ కేఆర్ ఈ చిత్రాన్ని నిర్మిస్తున్నారు. తాజాగా ఈ సినిమా ఫస్ట్ లుక్ పోస్టర్ రిలీజ్ చేశారు. ఈ చిత్రం ఫిబ్రవరి 20న ఉదయం 11.30 గంటలకి, హైదరాబాద్‌లోని అన్నపూర్ణ స్టూడియోలో ప్రారంభం కానుంది. ఈ చిత్రానికి సిరివెన్నెల సీతారామశాస్త్రి తనయుడు యోగేశ్వర శర్మ సంగీతం సమకూరుస్తున్నారు. చిత్రంలోని పాటలన్నింటికీ సిరివెన్నెల సీతారామశాస్త్రి సాహిత్యం అందిస్తున్నారు. అవసరాల, మంచు లక్ష్మితో పాటు ఈ చిత్రంలో మహతి, నాగబాబు ముఖ్య పాత్రలు పోషిస్తున్నారు.