‘అరవింద సమేత’ ఎమోషనల్ సీన్‌ ఫొటో లీక్

ఎన్టీఆర్ నటిస్తున్న ‘అరవింద సమేత’ చిత్రానికి సంబంధించిన ఓ ఫొటో ప్రస్తుతం సోషల్ మీడియాలో చక్కర్లు కొడుతోంది. రొమాంటిక్‌, యాక్షన్ డ్రామాగా తెరకెక్కుతున్న ఈ చిత్రానికి త్రివిక్రమ్ దర్శకత్వం వహిస్తుండగా.. ఎస్. రాధాకృష్ణ‌ నిర్మాతగా వ్యవహరిస్తున్నారు. పూజాహెగ్దే తొలిసారి ఎన్టీఆర్‌తో ఆడిపాడనుంది.

రాయలసీమ ఫ్యాక్షన్ నేపథ్యంలో వస్తున్న ఈ సినిమాలోని ఓ ఫైట్‌కి సంబంధించిన ఫొటో ఇప్పుడు వైరల్‌గా మారింది. ఎన్టీఆర్‌కి తండ్రిగా నాగబాబు నటిస్తున్నట్లు ఇప్పటికే వార్తలురాగా.. వారిద్దరి మధ్య సినిమాలో వచ్చే కీలకమైన ఎమోషనల్ సీన్స్‌ని చిత్ర యూనిట్ ప్రస్తుతం తెరకెక్కిస్తోంది. ఇందులో నాగబాబు గాయాలతో పక్కన అపస్మారక స్థితిలో ఉండగా.. ఎన్టీఆర్ ప్రేమతో అతడ్ని తట్టిలేపే ప్రయత్నం చేస్తున్నాడు. ఈ సీన్‌ చిత్రీకరిస్తుండగా.. తీసిన ఫొటో ఇప్పుడు లీకైంది.

శరవేగంగా షూటింగ్ జరుపుకుంటున్న ఈ సినిమా ఇప్పటికే సగం చిత్రీకరణను పూర్తి చేసుకోగా.. దసరా స్పెషల్‌గా అక్టోబరు 10న ప్రేక్షకుల ముందుకు రానుంది.