పద్మావత్: ఆ రాష్ట్రాలపై కోర్టు ధిక్కారణ పిటిషన్!

షూటింగ్ ఆరంభం నుంచి ఆనేక ఆటంకాలను ఎదుర్కొన్న పద్మావత్ చిత్రం ఎట్టకేలకు గురువారం ప్రేక్షకుల ముందుకొచ్చింది. రాజస్థాన్, మధ్యప్రదేశ్, గుజరాత్, చత్తీస్‌గఢ్ రాష్ట్రాలు ఈ చిత్రాన్ని నిషేధించడంతో నిర్మాతలు సుప్రీంకోర్టును ఆశ్రయించిన విషయం తెలిసిందే. దీంతో 'పద్మావత్' సినిమాను అడ్డుకోరాదని... ప్రదర్శనకు ఎలాంటి ఆటంకం కలగకుండా చర్యలు తీసుకోవాల్సిన బాధ్యత ఆయా రాష్ట్ర ప్రభుత్వాలదేనని సుప్రీంకోర్టు స్పష్టం చేసింది. కానీ రాజస్థాన్, గుజరాత్, మధ్యప్రదేశ్, గోవా రాష్ట్రాల్లో ఈ చిత్ర ప్రదర్శనను నిలిపివేశారు. ఆందోళనకారులు థియేటర్లను తగులబెడతారనే భయంతో చిత్రాన్ని ప్రదర్శించడానికి యాజమాన్యాలు వెనుకడుగువేశాయి.

దీంతో సర్వోన్నత న్యాయస్థానం ఇచ్చిన ఉత్తర్వులను అమలు చేయకపోవడం, కోర్టు ధిక్కారణ నేరంగా పరిగణించాలని, ఆ నాలుగు రాష్ట్రాలకు వ్యతిరేకంగా సుప్రీంకోర్టులో పిటిషన్ దాఖలైంది. సుప్రీం ఆదేశాల మేరకు భద్రతా చర్యలను చేపట్టడంలో ఈ నాలుగు రాష్ట్ర ప్రభుత్వాలు విఫలమయ్యాయంటూ పిటిషనర్ పేర్కొన్నాడు. అలాగే రాజ్‌పుత్ కర్ణిసేనకు చెందిన ముగ్గురు కీలక వ్యక్తులపై కూడా కోర్టు ధిక్కారణ పిటిషన్ వేశారు. ఈ పిటిషిన్లపై సుప్రీంకోర్టు సోమవారం విచారణ చేపట్టనుంది. కర్ణిసేన హెచ్చరికలతో కొన్ని రాష్ట్రాల్లో పోలీసులు అత్యంత కట్టుదిట్టమైన భద్రతను ఏర్పాటుచేశారు. ముందస్తు చర్యల్లో భాగంగా కర్ణిసేనకు చెందిన 30 మంది కార్యకర్తలను ముంబైలోనూ, 44 మందిని అహ్మదాబాద్‌లోనూ అదుపులోకి తీసుకున్నారు.

ఢిల్లీలోని ఓ మల్టీప్లెక్స్‌లో రాజ్‌పుత్ గ్రూప్‌నకు చెందిన వారిగా అనుమానిస్తూ కొంతమందిని పోలీసులు అరెస్ట్ చేశారు. పద్మావత్ విడుదల సందర్భంగా ఎలాంటి అవాంఛనీయ సంఘటనలు తలెత్తకుండా యూపీలో థియేటర్ల వద్ద భద్రతను ఏర్పాటుచేశారు. చట్టాన్ని ఎవరైనా చేతిలోకి తీసుకోవడానికి ప్రయత్నిస్తే కఠిన చర్యలు తప్పవని పోలీస్ అధికారులు హెచ్చరించారు. బుధవారం హింసాత్మక ఘటనలు చోటుచేసుకోవడంతో ఢిల్లీ-యూపీ, హరియాణా సమీపంలోని పాఠశాలను మూసివేశారు.