రంగస్థలంలో ఆ పాత్ర నాదే.. కానీ..?: అనుపమ

రంగస్థలం సినిమాలో సమంత పోషించిన రామలక్ష్మి పాత్ర కోసం తొలుత తననే చిత్ర బృందం సంప్రదించినట్లు నటి అనుపమ పరమేశ్వరన్ వెల్లడించింది. సాయిధరమ్‌ తేజ్‌తో కలిసి ఆమె నటించిన ‘తేజ్ ఐ లవ్‌ యూ’ సినిమా రానున్న శుక్రవారం విడుదలకానుండటంతో తాజాగా మీడియాతో అనుపమ మాట్లాడింది. ‘అఆ’ సినిమా చేసేటప్పుడు త్రివిక్రమ్‌ తెలుగు నేర్పించడంతో.. తనకు భాషపరంగా ప్రస్తుతం ఎలాంటి ఇబ్బందులు లేవని వెల్లడించిన అనుపమ.. ‘తేజ్ ఐ లవ్‌ యూ’ సినిమాని దర్శకుడు కరుణాకరన్ చాలా బాగా తెరకెక్కించాడని కితాబిచ్చింది.

‘రంగస్థలంలోని రామలక్ష్మి పాత్ర కోసం తొలుత నన్నే సంప్రదించారు. కానీ.. కొన్ని కారణాల వల్ల ఆ సినిమా చేయలేకపోయా. ఆ తర్వాత సినిమా చూశాను. సమంత చాలా బాగా నటించింది. రామలక్ష్మి పాత్రకి తను మాత్రమే న్యాయం చేయగలదు అనిపించింది.. ఆ విషయాన్ని దర్శకుడు సుకుమార్‌కి కూడా చెప్పాను. ఇటీవల విడుదలైన మహానటి సినిమాలో కీర్తి సురేశ్ కూడా చక్కగా నటించింది. ఇలాంటి పాత్రలు తెరపై చూసినప్పుడు నటిగా నేను స్ఫూర్తి పొందుతా. ప్రస్తుతం తెలుగుపరంగా ఎలాంటి ఇబ్బంది లేదు. అఆ సినిమా సెట్‌లో అందరూ తెలుగు మాట్లాడేవారు. త్రివిక్రమ్‌గారు ప్రతి పదాన్ని విడమర్చి స్పష్టంగా అర్థం చెప్పడంతో నేను సులువుగా నేర్చుకోగలిగాను’ అని అనుపమ పరమేశ్వరన్ వెల్లడించింది.