దేవ్ పటేల్‌కు ఆస్కార్ అందుకే రాలేదా?

భారత సంతతికి చెందిన బ్రిటిష్ నటుడు దేవ్ పటేల్‌కు 89వ అకాడమీ అవార్డుల్లో నిరాశ ఎదురైంది. ‘లియన్’ చిత్రంలో నటనకు గాను ఉత్తమ సహాయ నటుడిగా ఇప్పటికే బ్రిటిష్ అకాడమీ ఫిల్మ్ అవార్డు సొంతం చేసుకున్న దేవ్‌కు ఆస్కార్ ఖాయమని అంతా అనుకున్నారు. అయితే దేవ్ పటేల్‌ను వెనక్కి నెట్టి మహెర్షలా అలీ ఉత్తమ సహాయ నటుడి అవార్డును సొంతం చేసుకున్నాడు. ‘మూన్‌లైట్’ సినిమాలో కనబరిచిన నటనకు గాను అలీకి ఈ అవార్డు దక్కింది.

అయితే దేవ్ పటేల్‌‌ను ఆస్కార్‌కు ఎంపిక చేయకపోవడం పట్ల మరో వాదన కూడా వినిపిస్తోంది. సాధారణంగా అకాడమీ అవార్డుల్లో బ్రిటిష్ సినిమాలకు ఎప్పుడూ వివక్ష ఎదురవుతూనే ఉంటుంది. అంతర్జాతీయంగా ఎన్ని గొప్ప అవార్డులు గెలిచిన ఆస్కార్‌లో మాత్రం నిరాశ తప్పదు. అయితే దేవ్ పటేల్ నటించిన ‘లియన్’ కూడా బ్రిటిష్ సినిమానే. అందుకనే దేవ్‌కు అవార్డు దక్కలేదని విమర్శకుల వాదన. కాగా, లాస్ ఏంజిల్స్‌లోని డాల్బీ థియేటర్‌లో జరిగిన ఆస్కార్ అవార్డుల ప్రదానోత్సవానికి దేవ్ తన తల్లి అనితా పటేల్‌తో కలసి వచ్చారు. వీరిద్దరూ రెడ్‌కార్పెట్‌పై ఫొటోలకు పోజులిచ్చారు.