Renu Desai: రేణు దేశాయ్ డైరెక్షన్లో తెలుగు సినిమా.. కాన్సెప్ట్ బాగుంది!

ఇటీవలే ఎంగేజ్‌మెంట్ చేసుకున్న రేణు దేశాయ్.. త్వరలోనే పెళ్లి పీటలు ఎక్కబోతున్నారు. తన ఎంగేజ్‌మెంట్ ఫొటోలను సోషల్ మీడియాలో పోస్ట్ చేసిన రేణు.. కాబోయే భర్త ఎవరనేది మాత్రం బయటపెట్టలేదు. నటిగా సినీ ప్రస్థానం మొదలుపెట్టిన ఆమె.. పవన్‌తో విడాకుల అనంతరం దర్శకురాలిగా మారారు. 'ఇష్క్ వాలా లవ్' అనే మరాఠీ చిత్రాన్ని ఆమె తెరకెక్కించారు. పెళ్లి తర్వాత కూడా సినిమాలు చేస్తానని ప్రకటించిన రేణు.. తెలుగులో ఓ సినిమా చేసే దిశగా అడుగులేస్తున్నారు.

డ్యాన్స్ రియాల్టీ షోలో జడ్జిగా వ్యవహరించడం కోసం హైదరాబాద్ వచ్చినప్పుడు.. తెలుగు సినిమాకు ఎప్పుడు దర్శకత్వం వహిస్తారని చాలా మంది అడిగారు. దీంతో నా తర్వాతి చిత్రం తెలుగులో చేయాలని నిర్ణయించుకున్నానని రేణు తెలిపారు. రైతు ఆత్మహత్యల నేపథ్యంలో సినిమా తీస్తానని ఆమె చెప్పారు. స్క్రిప్ట్ వర్క్ పూర్తయ్యింది, డైలాగ్‌లపై కసరత్తు చేస్తున్నానని రేణు తెలిపారు.

‘చిన్నప్పుడు నాన్నతో కలిసి వ్యవసాయ పనుల్లో పాల్గొనేదాన్ని. కాబట్టి ఎలా పని చేస్తారో తెలుసు. కానీ పొలానికి వెళ్లి చాలా ఏళ్లయ్యింది. రైతుల జీవితాలను దగ్గర్నుంచి పరిశీలించాలని అనుకుంటున్నా. అందుకే ఓ గ్రామానికి వెళ్లి వాళ్ల జీవితాలను అధ్యయనం చేస్తా’నని రేణు తెలిపారు.

ఈ సినిమాలో రైతుల సమస్యలే కాదు, వాటికి పరిష్కరాలను సైతం చూపిస్తామని రేణు చెప్పారు. వచ్చే ఏడాది ఆరంభంలో ఈ చిత్రం షూటింగ్ ప్రారంభిస్తామని ఆమె తెలిపారు. ప్రజా జీవితంలోకి వచ్చిన పవన్ కల్యాణ్ రైతుల కోసం పోరాటం చేస్తున్నారు. ఆయనతో విడిపోయిన.. రేణు దేశాయ్ కూడా రైతు సమస్యలే ఇతివృత్తంగా సినిమా చేస్తుండటం యాదృచ్ఛికం.