కార్తికేయకు పవన్ కళ్యాణ్ ‘రిటర్న్ గిఫ్ట్’.. ఉబ్బితబ్బిబ్బవుతోన్న యంగ్ హీరో

పవర్ స్టార్ పవన్ కళ్యాణ్ ఈరోజు (సెప్టెంబర్ 2న) 49వ ఏట అడుగుపెట్టిన సంగతి తెలిసిందే. పవన్ పుట్టినరోజు సందర్భంగా టాలీవుడ్ ప్రముఖులు చాలా మంది ఆయనకు పుట్టినరోజు శుభాకాంక్షలు తెలిపారు. ట్విట్టర్ ద్వారా జనసేనానికి బర్త్‌డే విషెస్ తెలియజేశారు. వారందరికీ పవన్ కళ్యాణ్ ట్విట్టర్ ద్వారా రిప్లై ఇచ్చారు. ప్రతి ఒక్కరి ట్వీట్ కింద థ్యాంక్స్ చెబుతూ కామెంట్లు రాశారు. అయితే, పవన్ కళ్యాణ్ ఇచ్చిన రిప్లైకి యంగ్ హీరో కార్తికేయ సర్‌ప్రైజ్ అయ్యారు. దీనికా కారణం ఉంది. కార్తికేయను పవన్ కళ్యాణ్ ‘సార్’ అని సంబోధించారు. దీంతో కార్తికేయ ఆశ్చర్యపోయి రిప్లై ఇచ్చారు.

Also Read: పవన్ కళ్యాణ్‌కు పాయల్ రాజ్‌పుత్ పుట్టినరోజు కానుక

‘‘సార్ సార్ సార్.. సర్ ఏంటి సార్.. మీకు ఉన్న కోట్లాది మంది అభిమానుల్లో నేనూ ఒకడిని. మీరు నాకు రిప్లై ఇవ్వడం చాలా గొప్ప విషయం నాకు. మీ బర్త్‌డేకి రిటర్న్‌లో నాకు ఎప్పటికీ మరిచిపోలేని గిఫ్ట్ ఇచ్చారు. థాంక్యూ సార్. నాకు చాలా చాలా సంతోషంగా ఉంది’’ అని కార్తికేయ ట్వీట్ చేశారు.
కార్తికేయకు మాత్రమే కాదు.. మరో యంగ్ హీరో సత్యదేవ్‌కు కూడా పవన్ కళ్యాణ్ ఇలానే రిప్లై ఇచ్చారు. ‘‘థాంక్యూ సత్యదేవ్ గారు. మీ లేటెస్ట్ ఫిలిం ‘ఉమామహేశ్వర ఉగ్రరూపస్య’ సినిమాలోని మీ నటనకు నేను ఎంతగానో ఎంజాయ్ చేశాను. ఆల్ ది బెస్ట్’’ అని ట్వీట్‌లో స్పందించారు. అలాగే, మహేష్ బాబు, రవితేజ, వెంకటేష్, నాని, మోహన్‌లాల్, మంచు మనోజ్, సుధీర్ బాబు, సునీల్, నదియా, కోన వెంకట్, బ్రహ్మాజి.. ఇలా చాలా మంది సినీ ప్రముఖులకు పవన్ రిప్లై ఇచ్చారు. ప్రతి ఒక్కరికీ ఎంతో మర్యాదగా కృతజ్ఞతలు తెలిపారు. అయితే, మంచు మనోజ్‌కు మాత్రం ప్రత్యేకంగా.. ‘‘తమ్ముడు మనోజ్‌కి బంగారు భవిష్యత్తు రావాలని కోరుకుంటున్నాను’’ అని ట్వీట్‌లో పేర్కొన్నారు.