Shamna Kasim: మోసపోతే దానికి కారణం నా భర్త కాదు.. నటి పూర్ణ వార్నింగ్

టెక్నాలజీ అభివృద్ధి చెందుతున్న కొద్దీ సైబర్ మోసాలు కూడా పెరుగుతున్నాయి. ప్రజల జీవితంలో భాగమైపోయిన మొబైల్ ఫోన్ ద్వారానే ఎక్కువగా సైబర్ మోసాలు జరుగుతున్నాయి. పాపులర్ మెసేజింగ్ ప్లాట్‌ఫాం వాట్సాప్‌ను సైబర్ మోసగాళ్లు ఆయుధంలా వాడుకుంటున్నారు. జనాలను టెంప్ట్ చేస్తూ వారికి డబ్బు ఆశ చూపించి వాళ్ల దగ్గర నుంచే ఆ డబ్బును కొట్టేస్తున్నారు. ఈ సైబర్ మోసాలపై పోలీసులు ఎన్ని అవగాహనా కార్యక్రమాలు చేపడుతున్నా ఇలాంటి ఫ్రాడ్స్ మాత్రం ఆగడం లేదు. తాజాగా నటి పూర్ణ అలియాస్ షమ్నా కాసిం భర్త పేరుతో వాట్సాప్‌లో కొన్ని మెసేజ్‌లు వస్తున్నాయి. ఇవి కూడా ఆర్థక లావాదేవీలకు సంబంధించిన మెసేజ్‌లే. అయితే, వీటిపై జాగ్రత్తగా ఉండాలని పూర్ణ హెచ్చరిస్తున్నారు.దుబాయ్‌లో స్థిరపడిన వ్యాపారవేత్త, జేబీఎస్ గ్రూప్ కంపెనీ వ్యవస్థాపకుడు, సీఈవో షానిద్ ఆసిఫ్ అలీని నటి పూర్ణ గతనెల 24న పెళ్లాడారు. దుబాయ్‌లో వీరి వివాహం అంగరంగ వైభవంగా జరిగింది. హల్దీ, మెహంది, పెళ్లి, రిసెప్షన్‌కు సంబంధించిన ఫొటోలను పూర్ణ ఇన్‌స్టాగ్రామ్ ద్వారా అభిమానులతో పంచుకున్నారు. తన భర్త కంపెనీకి సంబంధించిన ఈవెంట్లను కూడా ఇన్‌స్టాగ్రామ్ పేజ్ ద్వారా ప్రమోట్ చేస్తున్నారు. అయితే, తాజాగా ఆమె ఇన్‌స్టాగ్రామ్ స్టోరీలో ఒక పోస్ట్ పెట్టారు. అది తన భర్త పేరుతో జరుగుతున్న సైబర్ మోసానికి సంబంధించిన పోస్ట్.

+971 52 724 5366 ఫోన్ నంబరు కలిగిన వాట్సాప్ అకౌంట్ ద్వారా తన భర్త షానిద్ పేరుతో ఒకరు కాంటాక్ట్ చేస్తున్నట్టు తన దృష్టికి వచ్చిందని.. అది తన భర్త కాదని.. ఈ విషయంలో చాలా జాగ్రత్తగా ఉండాలని పూర్ణ తన పోస్ట్‌లో పేర్కొన్నారు. ఈ ప్రొఫైల్‌తో మీరు ఏవైనా లావాదేవీలు జరిపితే దానికి తన భర్త ఎట్టిపరిస్థితుల్లో బాధ్యుడు కాదని స్పష్టం చేశారు.

పూర్ణ భర్త షానిద్‌కు చెందిన జేబీఎస్ గ్రూప్ ఆఫ్ కంపెనీస్ యూఏఈలో పలు లావాదేవీలు నిర్వహిస్తోంది. దుబాయ్ ప్రభుత్వం నుంచి అన్ని రకాల అనుమతులను ఈ కంపెనీ తన వినియోగదారులకు అందిస్తోంది. గోల్డెన్ వీసాలు సైతం ఈ కంపెనీ ప్రొవైడ్ చేస్తోంది. తాజాగా తమిళ స్టార్ హీరో చియాన్ విక్రమ్‌కు యూఏఈ గోల్డెన్ వీసా ఇప్పించారు. ఈ కార్యక్రమంలో పూర్ణ కూడా పాల్గొన్నారు. ఈ ఈవెంట్‌ను పూర్ణ ఇన్‌స్టాగ్రామ్ ద్వారా లైవ్ ఇచ్చారు. అంతకు ముందుకు ప్రభుదేవాకు కూడా గోల్డెన్ వీసా ఇప్పించారు.