మోడీ.. పవన్‌ను పట్టించుకోలేదా..?

స్వచ్ఛతాహీ సేవా..లో భాగస్వామ్యులు కావాలని అంటూ.. దేశ వ్యాప్తంగా అనేక మంది సెలబ్రిటీలకు ప్రధానమంత్రి నరేంద్రమోడీ లేఖలు రాస్తూ వస్తున్నారు. ఈ జాబితాలో సినిమా వాళ్లు ప్రధానంగా కనిపిస్తున్నారు. బాలీవుడ్, టాలీవుడ్ తో సహా దక్షిణాదికి చెందిన ఇతర చిత్ర పరిశ్రమల ప్రముఖులకు కూడా మోడీ లేఖలు రాశారు. ఈ కార్యక్రమంలో సెలబ్రిటీలు భాగస్వామ్యులు అయితే..మరింత మందిలో ఈ విషయంపై అవగాహన పెరుగుతుందని మోడీ లేఖల్లో పేర్కొన్నారు.

తెలుగుకు సంబంధించి దర్శకుడు రాజమౌళి, సీనియర్ నటుడు మోహన్ బాబు, స్టార్ హీరోలు మహేశ్, ప్రభాస్ లకు ప్రధానమంత్రి నుంచి లేఖలు వచ్చాయని తెలుస్తోంది. అలాగే మలయాళీ స్టార్ హీరో మోహన్ లాల్ కూడా మోడీ లేఖలు అందుకున్న దక్షిణాది తారల్లో ఒకరు. మరి వచ్చిన వారి సంగతి సరే కానీ, మోడీ నుంచి లేఖలు కొంతమందికి రాలేదనే అంశం చర్చనీయాంశంగా మారింది. ప్రత్యేకంగా.. తెలుగు సినిమా హీరో పవన్ కల్యాణ్ కు మోడీ నుంచి లేఖ రాలేదనే అంశం ఇప్పుడు చర్చలోకి వస్తోంది.

గత ఎన్నికల్లో పవన్ కల్యాణ్ భారతీయ జనతా పార్టీ తరఫున ప్రచారం చేశారు. తెలుగునాట జరిగిన ఎన్నికల సభల్లో మోడీ తో వేదికను పంచుకున్నాడు. మరి అలాంటి పవన్ కల్యాణ్ ను ప్రస్తుతానికి మోడీ విస్మరించినట్టుగా ఉన్నాడనే మాట వినిపిస్తోంది. దీనికంతటికీ కారణం.. భారతీయ జనతా పార్టీపై పవన్ కల్యాణ్ కొన్ని సార్లు ఆగ్రహావేశాలు వ్యక్తం చేయడమే అనే విశ్లేషకులు అంటున్నారు. తను ఎన్డీయే నుంచి వైదొలిగినట్టుగా ఆ మధ్య పవన్ కల్యాణ్ ప్రకటించాడు. ఈ నేపథ్యంలోనే పవన్ ను పీఎం పట్టించుకోలేదని.. ఇతర టాలీవుడ్ నటులకు లేఖలు రాసి కూడా పవన్‌ భాగస్వామ్యాన్ని కోరుతూ లేఖ రాయకపోవడానికి కారణం అదేననే అభిప్రాయాలు వ్యక్తం అవుతున్నాయి. మరి ప్రధాని నుంచి పవన్ కు కాస్త లేటుగా లేఖ వస్తుందా? లేక పై విశ్లేషణే నిజం అవుతుందా? చూడాలి మరి!