శివబాలాజీ భార్యను వేధించిన వాళ్లను కనిపెట్టేశారు!

తన భార్య మధుమిత (స్వప్న మాధురి)కు అశ్లీల మెయిల్స్ పంపుతున్నారంటూ నటుడు శివబాలాజీ ఆదివారం సైబర్ పోలీసులకు ఫిర్యాదు చేసిన విషయం తెలిసిందే. శివబాలాజీ ఫిర్యాదు మేరకు కేసు నమోదు చేసిన పోలీసులు దీనిపై దర్యాప్తు చేపట్టి మధుమితను అశ్లీల మెసేజ్ లతో వేధించింది ఎవరో కనిపెట్టేశారు. ఆమె ఫేస్‌బుక్ లాంటి సోషల్ మీడియా ఖాతాలకు వచ్చిన మెసేజ్‌ల ఐపీ అడ్రస్‌లను సేకరించిన పోలీసులు, ఓ వ్యక్తిని అనుమానిస్తూ, ప్రశ్నించేందుకు అదుపులోకి తీసుకున్నారు. అతడు ఎవరన్న విషయం అధికారికంగా ప్రకటించనప్పటికీ, సినీ పరిశ్రమకు సంబంధించిన వ్యక్తేనని సమాచారం. మధుమిత మొబైల్ ఫోన్‌కు సైతం అతడితోపాటు మరో వ్యక్తి పేరిట నమోదైన నెంబరు నుంచి ఆమెను కించపరిచేలా మెసేజ్‌లు వచ్చినట్టు గుర్తించారు. సదరు వ్యక్తి ఎవరన్న విషయమై ఆరా తీస్తున్నారు. త్వరలోనే నిందితుల వివరాలను బయటపెడతామని సైబరాబాద్ పరిధిలోని సైబర్ క్రైమ్ పోలీసు వర్గాలు వెల్లడించాయి.

తనపై ఉన్న కోపంతో తనను ఏమీ అనలేక కొందరు పనిగట్టుకుని తన భార్యను టార్గెట్ చేసుకున్నారని శివబాలాజీ పేర్కొన్నారు. మార్ఫింగ్ వీడియోలు, ఫోటోలపై తాను పలుమార్లు గట్టిగా ఖండించానని గుర్తు చేసిన శివ, అందువల్లే కొందరు తనపై కక్షగట్టారని, ఈ ఎస్ఎంఎస్‌లు పంపింది వారి మనుషులేనని పరోక్షంగా ప్రత్యేకించి ఎవరి పేర్లనూ వెల్లడించని శివబాలాజీ, అతి త్వరలోనే నిందితులను పోలీసులు అరెస్టు చేస్తారన్న నమ్మకం ఉందని అన్నాడు. గతంలో కూడా నటుడు శివబాలాజీకి ఇలాంటి పరిస్థితే ఎదురైంది.