తెలంగాణ 'పూర్ణ'కి రాష్ట్రపతి ప్రశంసలు

తెలంగాణ బిడ్డ పూర్ణ మాలావత్ యదార్థగాధ ఆధారంగా తెరకెక్కిన బయోపిక్ మూవీ 'పూర్ణ' రాష్ట్రపతి ప్రణబ్ ముఖర్జీ ప్రశంసలు అందుకుంది. మార్చి 25న రాష్ట్రపతి భవన్‌లో రాష్ట్రపతి కోసం ఆ చిత్ర దర్శకుడు రాహుల్ బోస్ ఓ స్పెషల్ ప్రివ్యూ షో ఏర్పాటు చేశారు. ఈ సందర్భంగా సినిమా చూసిన ప్రణబ్ ముఖర్జీ మూవీ యూనిట్ సభ్యులని అభినందించకుండా వుండలేకపోయారట.

13 ఏళ్ల ప్రాయంలోనే ఎవరెస్ట్ శిఖరాన్ని అధిరోహించి, అతి చిన్న వయస్సులో ఎవరెస్ట్ ఎక్కిన బాలికగా రికార్డ్ సొంతం చేసుకున్న పూర్ణ రియల్ స్టోరీ ఆధారంగా రూపొందిన ఈ సినిమాకి టైటిల్ కూడా 'పూర్ణ' అని పెట్టిన సంగతి తెలిసిందే. జీవితంలో ఏదైనా సాధించాలనుకునే మహిళాలోకానికి ఈ సినిమా స్పూర్తిగా నిలుస్తుందని కితాబిచ్చారు ప్రణబ్. నిరుపేద కుటుంబంలో పుట్టిన గిరిజన బాలిక పూర్ణ సాధించిన విజయం చూసి ముచ్చటపడిన ప్రణబ్ ఈ సినిమా చూసిన అనంతరం ఆమెని అభినందించినట్టు తెలుస్తోంది. అదితి ఇనామ్‌దార్ అనే కొత్త ఆర్టిస్ట్ ఈ సినిమాలో పూర్ణ పాత్ర పోషించింది. రాహుల్ బోస్, అమిత్ సంయుక్తంగా నిర్మించిన ఈ సినిమా త్వరలోనే రిలీజ్ అవనుంది.