Bhasha Dinotsavam Telugu Songs: కమ్మనైన తెలుగు భాష.. తీయనైన తెలుగు పాట

‘వాణిహంసపై విహరించే వంశధార నా తెలుగు.. ఆదిభట్ల నారాయణుడి చిరతలు సవ్వడి నా తెలుగు.. ఘంటసాల స్వరపేటిక చాటిన గీతా మాధురి నా తెలుగు... తెల్ల దొరకు నిలువెల్ల వణుకు అల్లూరి మునుకు నా తెలుగు.. జబ్బచరిచి పెను దెబ్బ తీయగల బొబ్బిలి రోషం నా తెలుగు.. కోటి సింహముల గర్జన ఒకటౌ శ్రీ శ్రీ నుడి నా తెలుగు’.. అంటూ వేనోళ్ల పొగుడుట మన తెలుగుభాష గొప్పదనం. మన భావాలకు, అనుభూతులకు భావోద్వేగాలకు వాహిక తెలుగు భాష. అందుకే తెలుగు భాష అమ్మ భాష అయింది. ఉగ్గు పాల నుండి ఒక బిడ్డకి తల్లి పాట పాడేందుకు తెలుగు భాషలో ఉన్న మాధుర్యం అంతా ఇంతా కాదు.

భాషలోని స్పష్టత, అక్షర రమ్యత, నేర్పు, భావం, కూర్పు వర్ణనే ఓ అద్భుతం. అందుకే అనుకుంటా గుక్క పెట్టి ఏడ్చే బిడ్డ ఏడుపు అమ్మభాష కమ్మనైన పాటతో హాయిగా నిద్రలోకి జారేలా చేస్తుంది. ఎందరో మహనీయులు, కవులు, కవయిత్రులు మన తెలుగు భాష యొక్క ప్రాముఖ్యతను చాటి చెప్పుతూ చేసే పద ప్రయోగం ఎప్పటికీ అజరామరం. ‘తెలుగు భాష తీయదనం.. తెలుగుభాష గొప్పతనం తెలుసుకున్న వాళ్లకు తెలుగే ఒక తీయదనం’ అంటూ సినీ కవుల కలం నుంచి జాలువారిన ఆణిముత్యాల్లాంటి పాటల్లో కొన్నింటిని అంతర్జాతీయ మాతృభాష దినోత్సవం సందర్భంగా గుర్తుచేసుకుందాం..

తెలుగు జాతి మనదీ...
తేనె కన్నా తీయనిది తెలుగు భాష
తెలుగు భాష తీయదనం...
తెలుగంటే.. గోంగూర..
మా తెలుగు తల్లికి మల్లెపూల దండ..